वीरगंज । जंगली हात्तीको समूहले गएराति सिरहाको लहान नगरपालिका–१५ स्थित उत्तरवर्ती चुरे क्षेत्रका मोहनपुर र लग्रहाका ७ घर भत्काएका छन् । दुई वटा समूहमा आएका हात्तीले शुक्रबार राति बस्ती पसेर मोहनपुरका कपले यादव, लग्रहाका राम सदाय, लक्ष्मी, शिव कुमारी, दिपेन र सरोज सदायका ७ वटा फुसको घर भत्काएको हो । जंगली हात्तीले घर भत्काउनुका साथै अन्नबालीसमेत नष्ट गरेको लहान नगरपालिका–१५ का वडाध्यक्ष तेज नारायण चौधरीले जानकारी दिए ।
हात्तीले घर भत्काएको बस्तीमा पुगेर लहान नगरपालिकाका मेयर महेशप्रसाद चौधरीले पीडितहरुलाई तत्काल जस्तापाता, त्रिपाल र खाद्यान्नसहित राहत उपलब्ध गराउने बताए । गत वर्ष पुसमा जंगली हात्तीको समूह मोहनपुर गाउँ पसेर स्थानीयको घर भत्काएको थियो ।लहान नगरपालिकाका बानो, अमही, मोहनपुर, तरेगनासहित धनगढीमाई, गोलबजार र मिर्चैया नगरपालिकाका तीन दर्जनभन्दा बढी बस्ती बर्सेनि हात्तीको आक्रमणको चपेटामा पर्दै आएका छन् । हात्ती आक्रमणबाट ती क्षेत्रका बासिन्दाको बर्सेनि ज्यान जाने गरेको छ । कोसी टप्पु आरक्ष र उदयपुरको चुरे क्षेत्र हुँदै यस क्षेत्रमा जंगली हात्ती प्रवेश गरेको हुनसक्ने स्थानीयले बताए ।
वन्यजन्तु विज्ञहरु झापादेखि चितवनसम्मको चुरे क्षेत्र हात्ती हिँड्ने करिडोर भएकाले हिउँदयामको मौसममा जंगली हात्तीको खतरा बढी हुन्छ । तर हिउँदयाममा बर्सेनि हात्तीको चपेटा सहदै आए पनि यसवर्ष वर्षायाममा समेत जंगली हात्तीले दु:ख दिन थालेपछि स्थानीय त्रसित छन् ।
