वीरगंज । नेपाली कथानक चलचित्र ‘प्रकाश’ नेपाल रिलिज भएकै दिन अमेरिकामा पनि प्रदर्शन हुने भएको छ । अमेरिकामा पाँचवटा थिएटरमा ‘प्रकाश’ रिलिज हुनेछ । टेक्सासका तीनवटा सहर, ओहायो र क्यालिफोर्नियाका एक–एक सहरमा चलचित्र रिलिज हुने निर्देशक दिनेश राउतले जानकारी दिए ।
चलचित्र प्रदर्शनको समय र अग्रिम टिकट रिलिजको सात दिन अगाडि अनलाइनमार्फत उपलब्ध गराइने उनको भनाइ छ । यसबाहेक ‘प्रकाश’ अमेरिकाका ४० भन्दा बढी सहर र क्यानडाका पाँच सहरमा रिलिज हुने दिनेशको दाबी छ । “चलचित्र कम्तीमा दुई हप्ता दैनिक शो टाइम रिलिज हुनेछ,” चलचित्र ‘प्रकाशका निर्माता महेन्द्र अधिकारी भन्छन्, “नेपालमा रिलिज भएकै दिन अमेरिकामा एकैदिन नियमित शो टाइमसहित पाँचवटा हलमा रिलिज हुन लागेको नेपाली चलचित्रको इतिहासमा यो नै पहिलो पटक हो ।”
अगष्ट २७ मा जापानमा पनि चलचित्र रिलिज हुने उनले बताए । निर्माता महेन्द्रका अनुसार टोकियोको नाकानो जिरो हलमा ‘प्रकाश’ रिलिज हुनेछ ।
“जापानमा १४ सयदेखि १५ सय दर्शकलाई चलचित्र देखाउने जापानमा वितरणको जिम्मा लिएका साथीहरूले भन्नु भएको छ,” महेन्द्र भन्छन् । दिनेश राउतको निर्देशन र महेन्द्र अधिकारीको निर्माण रहेको चलचित्र नेपालमा भदौ १० गते रिलिज हुँदै छ । चलचित्रको मुख्य भूमिकामा प्रदीप खड्का, दीया मास्के, रेणु योगी, प्रकाश घिमिरेलगायत कलाकार छन् ।
