वीरगंज । चालु आर्थिक वर्षको साउन ६ गतेसम्म देशको धान रोपाइँ हुने कुल भू–भागमध्ये ८० प्रतिशतमा रोपाईँ सकिएको छ । कृषि तथा पशुपन्छी विकास मन्त्रालयका अनुसार गएको वर्षको सोही अवधिको तुलनामा रोपाइँ ८.८ प्रतिशतले कम हो । गएको वर्षको साउन ६ गतेसम्म ८८.८ प्रतिशत धान रोपाइँ भएको थियो ।
यो वर्ष प्रदेश नम्बर–१, मधेस प्रदेश र लुम्बिनी प्रदेशमा मनसुन सुरु हुन समय लागेकाले पनि रोपाइँमा कमी आएको मन्त्रालयका प्रवक्ता प्रकाशकुमार सञ्जेलले जानकारी दिए । साउन १५ गतेसम्म ती प्रदेशमा पनि रोपाइँ हुने देखिएकाले विगत वर्षहरूमा जस्तै लगभग शतप्रतिशत रोपाइँ हुने मन्त्रालयको प्रारम्भिक अनुमान छ । हाल देशभर कुल १५ लाख चार हजार ४८६.४२ हेक्टर क्षेत्रफलमा रोपाइँ हुँदै आएको छ । साउन ६ गतेसम्म ११ लाख ३२ हजार ९०८.०१ हेक्टर क्षेत्रफलमा धान रोपाइँ भएको मन्त्रालयको तथ्यांक छ ।
उक्त अवधिमा प्रतिशतको आधारमा सबैभन्दा बढी धान रोपाइँ सुदूरपश्चिम प्रदेशमा भएको छ । यो प्रदेशमा ९२.८० प्रतिशत रोपाइँ सम्पन्न भएको छ । सुदूरपश्चिममा करिब एक लाख ७८ हजार १६७ हेक्टरमा धान रोपाइँ हुन्छ । यो वर्षको साउन ६ सम्म एक लाख ६५ लाख ३३९ हेक्टर क्षेत्रफलमा रोपाइँ भएको छ । यस्तै, गण्डकी प्रदेशमा ८४.३ प्रतिशत, लुम्बिनीमा ७४.७ प्रतिशत, वाग्मती प्रदेशमा ७६ प्रतिशत, कर्णाली प्रदेशमा ७८.३ प्रतिशत, प्रदेश–१ मा ७७.९ प्रतिशत र मधेमा ६३.२ प्रतिशत रोपाइँ भएको छ । मधेसमा सबैभन्दा बढी क्षेत्रफलमा धान रोपाइँ हुन्छ । सबैभन्दा कम क्षेत्रफलमा धान रोपाइँ कर्णालीमा हुने गरेको छ । मधेसमा चार लाख पाँच हजार ५४० हेक्टर क्षेत्रफलमा रोपाइँ हुने गरेको छ । कर्णालीको ३८ हजार ८८६ हेक्टर क्षेत्रफलमा धान रोपाइँ हुने गरेको मन्त्रालयको तथ्यांक छ । गएको वर्ष साउन ६ गतेसम्म १२ लाख १७ हजार ४११.४७३ हेक्टर क्षेत्रफलमा रोपाइँ भएको थियो ।
