वीरगंज । भारतको केन्द्रीय सरकारका दुई मन्त्रीले बुधबार पदबाट राजीनामा दिएका छन्। प्रधानमन्त्री नरेन्द्र मोदी नेतृत्वको मन्त्रिपरिषद्का सदस्यद्वय मुख्तर अब्बास नाक्भी र आरसीपी सिंहले राजीनामा दिएका हुन्।

उनीहरु दुवै जना राज्य सभा सदस्य थिए। उनीहरुको राज्य सभा सदस्यको कार्यकाल बिहीबारदेखि सकिने भएकाले एक दिनुअघि नै मन्त्री पदबाट राजीनामा दिएका हुन्। मन्त्री भएकै बेला संसद सदस्यको म्याद सकिएर मन्त्री पद छोड्नु परेको यो पहिलोपटक हो। मन्त्री बनेको छ महिनाभित्र निर्वाचित भएर सांसद बन्नुपर्ने व्यवस्था छ। अब उनीहरुलाई पुनः मन्त्रीको शपथ खुवाउने सम्भावना पनि छ।

हालै भएको राज्य सभा निर्वाचनबाट धेरै नेता निर्वाचित भएर आएका छन्। भारतको उत्तर प्रदेश, महाराष्ट्र, मध्य प्रदेश र राजस्थानमा राज्य सभा निर्वाचन हालै भएको हो। अहिले भएको निर्वाचनमा नाक्भीलाई भने पार्टीले उम्मेदवार बनाएको थिएन। जेडीयू गठबन्धनको तर्फबाट बिहारबाट निर्वाचित भएका आरसीपी सिंहले सन् २०२१ को जुलाई ७ मा शपथ लिएका थिए।