वीरगंज । मिस्टर एन्ड मिस टिन वर्ल्ड नेपालको दोस्रो संस्करण आयोजना हुने भएको छ । विजेताले टर्कीको इस्तानबुलमा हुने टप मोडल अफ युनिभर्समा प्रतिस्पर्धा गर्ने अवसर पाउने छन् भने यस प्रतियोगिताको नलेज पार्टनर द व्रिटिस कलेजमा रु. २० लाख रुपैयाँसम्मको छात्रवृत्ति प्राप्त गर्नेछन् ।

पहिलो हुने प्रतिस्पर्धीले आयोजककातर्फबाट नगद पुरस्कार एकलाख तथा विभिन्न उपहारहरूसमेत प्राप्त गर्नेछन् भने सेकेन्ड रनर अपले ब्रिटिस कलेजबाट १५ लाखसम्मको छात्रवृत्ति तथा सम्पूर्ण सहभागीले पहिलो वर्षका लागि पचास प्रतिशत छात्रवृत्ति प्राप्त गर्ने आयोजकले बताएको छ ।

पूर्व मिस नेपाल उषा खड्गी, नायक सलोन बस्नेत, नायक सलिन मान बानियाँ, मोडल पुजा गिरी, कोरियोग्राफर रोजिन शाक्य लगायतका निर्णायक मण्डलमा रहने छन् ।प्रतियोगिताको पहिलो चरणको अडिसनका लागि मिस्टर एन्ड मिस टिन वर्ल्ड नेपालको फेसबुक पेजमा गएर अनलाइन फारम भर्नुपर्ने छ । १६ वर्षदेखि २१ वर्ष उमेर समूहका यूवाहरुले सहभागिता जनाउन सक्ने आयोजकले जनाएको छ । फेलिज इन्टरनेसनलले आयोजना गर्ने मिस्टर एन्ड मिस टिन वर्ल्ड नेपालको पहिलो संस्करण २०१७ मा आयोजना गरिएको थियो ।