वीरगंज । क्रिकेट विश्वकप लिग २ अन्तर्गतको सिरिज खेल्न नेपाली टोली अमेरिकामा छ। नेपाल, अमेरिका र ओमन सम्मिलित त्रिकोणात्मक सिरिजमा नेपालले पहिलो खेल ओमनसँग खेलेको थियो। आज बेलुकी सवा ९ बजेबाट सुरु हुने दोस्रो खेल अमेरिकासँग खेल्दैछ। अमेरिका पुगेर नेपाली टोलीले दुईवटा अभ्यास खेल नखेल्दै नेपाल क्रिकेट संघ (क्यान)ले जानकारी दियो : ओपनरद्वय आशिफ शेख र कुशल भुर्तेल घाइते छन्। त्यसैले नेपालबाट सुवास खकुरेललाई टीममा बोलायो। नभन्दै ओमनविरुद्धको खेलमा ओपनिङ सम्हाले खकुरेल र सुनिल धमलाले। तर, ओपनिङमा यो जोडीले राम्रो सुरुवात दिन सकेन।
नेपाली क्रिकेटमा सबैभन्दा धेरै गिजोलिएको पक्ष हो ओपनिङ। खासगरी नेपाली टोलीको प्रशिक्षणमा डेभ ह्वाटमोर आउनुअघि धेरै परीक्षण भए। र, सबैजसो फ्लप रहे। ओपनिङमा लगभग सँधैजसो ठूलो स्कोर बन्न नसक्दा र सस्तैमा आउट भइदिँदा पछाडिका ब्याट्सम्यानहरु दबावमा परे। तर, ह्वाटमोरको आगमनपछि ओपनिङमा भुर्तेल र शेखको जोडीलाई अघि सारे। जुन सफल पनि देखियो। र, उनीहरुले निरन्तरता पनि पाए। उनीहरु नेपालको पारीलाई अघि बढाउन सफल देखिए। नेपालको ओपनिङ ब्याटिङमा आशासमेत पलायो। तर, यी दुई खेलाडी घाइते भएपछि नेपाली टोली समस्यामा देखिन्छ। ओमनसँगको खेलमा ओपनर खकुरेल ३ र धमला १२ रनमा आउट हुँदा नेपाली टोलीको ब्याटिङमा दबाव सुरु भएको थियो। अझ नेपाली टोलीका प्रमुख ब्याट्सम्यान दीपेन्द्रसिंह ऐरी र रोहित पौडेलले पनि उल्लेखनिय योगदान दिन नसक्दा सम्झनलायक प्रदर्शन आरिफ शेख र युवा खेलाडी देव खनालको मात्र रह्यो। त्यसबाहेक अर्का अनुभवी ब्याट्सम्यान बिनोद भण्डारीको प्रदर्शन बिर्सनलायक थियो। उनले ४६ बलमा १४ रन बनाउँदै आउट भएका थिए। त्यसैले त बलिङमा कसिलो प्रदर्शन गरेर पनि नेपालको हातबाट खेल गुम्यो।
परिचित अमेरिका, घरेलु दबाव
अमेरिकामा नेपाली टोलीले पहिलोपटक खेलिरहेको छ। त्यहाँको अवस्थासँग अनुकुल हुन नेपाली टोली १० दिन अगावै अमेरिका पुगेको थियो। त्यहाँको ‘कन्डिसन’ मा भिज्न दुइवटा अभ्यास खेल पनि खेलेको थियो। तर, प्रतियोगिताको आफ्नो पहिलो खेलमा भने पराजय ब्यहोर्यो।
नेपाल र अमेरिकाले पछिल्लो ४ वटा एकदिवसीय खेल खेल्दा नतिजा नेपालको पक्षमा देखिन्छ। नेपालले तीनवटा खेल जित्दा पछिल्लो एक खेल अमेरिकाले जितेको थियो। तर, त्यसो भन्दैमा अमेरिकालाई कमजोर आँक्ने अवस्था छैन। अमेरिकासँग भारत पाकिस्तानबाट क्रिकेटको पृष्ठभूमि लिएका बलिया खेलाडीको उपस्थिति छ। अझ नेपालले बलिङमा खुल्न नदिएको ओमनसँग ब्याटिङ फितलो गरेर हार ब्यहोरिरहँदा त्यसभन्दा अघिल्लो खेलमा अमेरिकाले ओमनलाई हराएको थियो। अर्थात घरेलु मैदानको फाइदा उठाउने दाउमा हुनेछ अमेरिकी टिम।
अंकतालिकामा दबाव
विश्वकप लिग – २ मा नेपालको प्रदर्शन औसतमात्र छ। सात टिम सम्मिलित ओडिआई साइकलमा नेपाली टोलीले १३ खेलबाट ६ जित र ७ हार ब्यहोर्दै तालिकाको छैटौं स्थानमा छ। नेपालभन्दा पछाडि २ अंक जोडेको नामिबियामात्र छ। विश्वकपको रोडम्यापका रुपमा हेरिएको लिग २ मा नेपाललाई शीर्ष तीनमा पर्ने दबाव छ।
उसो त सात टिममध्ये सबैभन्दा कम खेलेको टोली नै नेपाली टोली हो। तालिकामा सर्वाधिक ३४ खेल खेलेको ओमन ४२ अंकसहित शीर्षस्थानमा छ भने २० खेल खेलेको स्कटल्याण्ड २८ अंक जोडेर दोस्रो, २२ खेल खेलेको यूएई २६ अंक जोडेर तेस्रो, २१ खेल खेलेको अमेरिका २० अंक जोडेर चौथो र १४ खेल खेलेको नामिबिया १४ अंक जोडेर पाँचौ स्थानमा रहँदा नेपाल १२ अंक जोडेर छैटौं तथा पपुवा न्युगिनी २ अंक जोडेर पुछारमा छ।
