स्थानीय तह निर्वाचनमा उम्मेदवारी दिन ओखलढुंगाका २० जना शिक्षकले जागिरबाट राजीनामा दिएका छन् । चुनाव लड्न जिल्लाका विभिन्न सामुदायिक विद्यालयका २० जना शिक्षकले जागिरबाट राजीनामा दिएका हुन् । स्थानीय निर्वाचन घोषणा भएपछि दुई महिनाको अवधिमा जिल्लामा २० जना शिक्षकले राजीनामा बुझाएको शिक्षा विकास तथा समन्वय इकाइ प्रमुख नेत्रप्रसाद गजुरेलले बताए । राजीनामामा विविध व्यक्तिगत कारण भनिए पनि अधिकांश शिक्षकले चुनाव लड्ने उद्देश्यले राजीनामा दिएको उनको भनाइ छ ।

देवी आधारभूत विद्यालय, मानेभञ्ज्याङका शिक्षक रामचन्द्र महतो, सरस्वती आधारभूत विद्यालय, रावादोलुका रामबहादुर बस्नेत, कालिका आधारभूत विद्यालय, आहालेका शिक्षक चन्द्र कटुवाल, जेसे मावि, जेसे पात्लेका गुन्जबहादुर सुनुवार, बालज्योति मावि चित्रेका मधुकरप्रसाद चौधरी, जन्तरखानी माध्यमिक विद्यालय, जन्तरखानीका प्रधानाध्यापक मेखबहादुर मगरको राजीनामा स्वीकृत भएको इकाइ प्रमुख गजुरलले जानकारी दिए ।

यस्तै, हिमगंगा मावि, रावादोलुका शिक्षक डिल्लीराम बस्नेत, तिलक विश्वकर्मा र टोपबहादुर बस्नेतलगायत हर्कपुर माध्यमिक विद्यालय, मानेभञ्ज्याङका गोविन्दप्रसाद अधिकारी, कालिका आधारभूत विद्यालय, चुहानछापका शिक्षक जयकुमार कार्की, कालिका आधारभूत विद्यालय, भालुथुम्काका शिक्षक युवराज घिमिरेको पनि राजीनामा स्वीकृत भएको छ । सोडान्तर आधारभूत विद्यालय, मानेभञ्ज्याङका होमप्रसाद दाहाल, भूमेथान आधारभूत विद्यालयका शिक्षक तोयानाथ काफ्ले, चन्चला आधारभूत विद्यालय, खोदम्पाका शिक्षक बालकुमार खड्का र जन्तरखानी मावि, जन्तरखानीका शिक्षक शंखवीर राईले पनि शिक्षण पेसा त्यागेर राजीनामा दिएको शिक्षा विकास तथा समन्वय इकाइ ओखलढुंगाले जनाएको छ ।

कार्यालयका अनुसार राजीनामा दिनेहरूमध्ये अधिकांश शिक्षकहको पेन्सनको समय भइसकेको छ ।