सरकारले दुई दिन बिदा दिने निर्णय गरे पनि सार्वजनिक गरेको छैन । बिहीबार बसेको मन्त्रिपरिषद्ले शनिबार र आइतबार गरी दुई दिन बिदा दिन निर्णय गरेको बैठकमा सहभागी मन्त्रीहरूले बताए पनि सार्वजनिक भने भएको छैन
पेट्रोलियम पदार्थ खपत घटाउनका लागि नेपाल आयल निगमले दुई बिदा दिन सकिने प्रस्ताव गरेको थियो । यसबारे अर्थमन्त्रालयमा छलफलपछि मन्त्रिपरिषद्मा प्रस्ताव पेस गरिएको थियो । बिहीबारको मन्त्रिपरिषद बैठकका निर्णय सञ्चार तथा सूचना प्रविधिमन्त्री ज्ञानेन्द्र बहादुर कार्कीले सार्वजनिक गर्दा यो निर्णय उनले सुनाएनन् । उनले राजदूतसहित अन्य सरकारी नियुक्तिसहित २३ ओटा बुँदामा निर्णय सुनाएका थिए ।
किन सार्वजनिक गरिएन त शनिबार र आइतबार बिदा दिने निर्णय ? एक मन्त्रीका अनुसार मन्त्रिपरिषदले दुई बिदा दिन निर्णय नीतिगत रूपमा भएकाले सार्वजनिक नगरिएको हो । राष्ट्रिय बिदाको हिसाबकिताब र शुक्रबारको आधार दिनको बिदा पनि कटौती गर्नुपर्ने भएकाले हतारमा निर्णय सार्वजनिक नभएको हुन सक्ने उनको भनाइ छ । उनले बिदा दिने निर्णयबारे थप गृहकार्य गर्नुपर्ने पनि औँल्याए ।
‘हप्तामा दुई दिन बिदा दिँदा राष्ट्रिय बिदाको पनि हिसाब गरेर कार्यान्वयन गर्नुपर्छ । यसका लागि थप गृहकार्य र काम गर्नुपर्ने देखिन्छ । त्यसैले हतारमा निर्णय सार्वजनिक नभएको हुन सक्छ,’ उनले भने ।
रुस-युक्रेन युद्धका कारण पेट्रोलियम पदार्थको मूल्य वृद्धि भएसँगै निगम चरम घाटामा पुगेको छ । निगमले इन्धनको खपत घटाएर विदेशी मुद्रा सञ्चिति बढाउनका लागि दुई दिन सार्वजनिक बिदाका साथै जोर-बिजोर प्रणाली लागू गर्ने लगायतका प्रस्ताव अर्थ मन्त्रालयमा पेस गरेको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।
