वीरगंज | गत माघ ४ मा संसदको शिक्षा तथा स्वास्थ्य समितिमा स्वास्थ्य तथा जनसंख्या मन्त्रालयका सचिव रोशन पोखरेलले नेपालले प्राप्त गरेर लगाएको कुल खोपमध्ये २० देखि २४ लाख डोज खोपको तथ्यांकबाट हराएको बताएका थिए ।

उनले भनेका थिए, ‘तेस्रो डोज लगाउन आउनेहरूले पहिलो र दोस्रो डोज लगाउँदा आफूले कार्ड नै नपाएको पनि बताउने गरेका छन् । यसको अर्थ पहिला खोप लगाए पनि हाम्रो तथ्यांकमा भने इन्ट्री भएको रहेनछ । यस्ता उदाहरण प्रशस्तै छन् । खोप कार्डबिना नै पहिलो र दोस्रो मात्राको खोप लगाएको तथा सहरी क्षेत्रमा केहीले पहिलो डोज भन्दै तेस्रो डोज पनि लगाएकाले केही लाख खोपको हिसाब मिलेको देखिँदैन ।’

स्वास्थ्यमन्त्री विरोध खतिवडाले शुक्रबार पत्रकार सम्मलेलनमार्फत् खोप नहराएको दाबी गरे । उनले भने, ‘२४ लाख खोपबारे तपाई पत्रकारहरुले प्रश्न गर्नुपर्थ्यो, गर्नुभएन । म विरोध भएकोले प्रश्न गरेर विरोधीको भूमिका निर्वाह गर्छु ।’

उनले खोप नहराएको बरु खोपको संस्थागत रेकर्डमा समस्या भएको बताए । खतिवडाले भने, ‘टोलटोलमा स्वास्थ्यकर्मी साथीहरु खोप बोकेर जानुभएको छ । रेकर्ड संस्थागत ढंगले माथिसम्म आउन नसकेको यथार्थ हो । १० वटा, ८ वटा, पाँच वटा भ्याक्सिनका प्याकेटहरु दिनभरी लगाउँदै जाँदा अन्तिममा १० वटाको प्याकेट खोलियो दुई जनाले मात्र लगाउनु भयो भने त्यो ८ वटा खेर जान्छ । खोप तथ्याकंबारे छानविन गर्न समिति पनि गठन भएको छ। ’

पूर्वप्रधानमन्त्री केपी शर्मा ओलीले शुक्रबार कार्यकर्तालाई प्रशिक्षण दिँदै २४ लाख मात्रा खोप खोई? भन्दै सरकारलाई प्रश्न गरेका थिए । उनले भने, ‘२४ लाख डोजका बारेमा कोही बोल्दैन । लाजशरम केही छैन । २४ लाख मात्राको हिसाब नेपाली जनतालाई चाहियो, त्यसको कुनै पनि समयमा छानविन हुन्छ ।’

स्वास्थ्यमन्त्री खतिवडाविरुद्ध खोप गायब भएको विषयमा एमालेनिकट राष्ट्रिय युवा संघले अख्तियार दुरुपयोग अनुसन्धान आयोगमा उजुरीसमेत दिएको छ ।