वीरगञ्ज । भोजपुरी भाषा, कला संस्कृतिको जगेर्ना गर्ने उद्देश्यका साथ बीरगंज महानगरपालिकाद्वारा स्थापना गरिएको भोजपुरी प्रतिष्ठानको कार्यालयको आज एक समारोहका बीच उद्घाटन गरिएको छ ।बीरगंज महानगरपालिकाका नगर प्रमुख विजय सरावगीले तत्कालीन रात्रि मावि रहेको भवनमा भोजपुरी प्रतिष्ठानको कार्यालय स्थापना गरी उद्घाटन गर्नु भएको हो ।

बीरगंज महानगरपालिकाले भोजपुरी प्रतिष्ठानको आफ्नै भवन निर्माणका लागि ५० लाख रुपैयाँ विनियोजन गरी भवन निर्माणको समेत शिलान्यास सम्पन्न भई सकेको छ । भवन निर्माण नहुँदा सम्म रात्रि माविमा प्रतिष्ठानको कार्यालय सञ्चालनमा रहने नगर प्रमुख सरावगीले बताउनुभयो ।

सो अवसरमा महानगरपालिकाद्वारा भोजपुरी प्रतिष्ठानको अध्यक्षमा उमाशङ्कर द्विवेदी सहित प्रतिष्ठानका अन्य सदस्यलाई महानगरपालिकाले नियुक्त गरी सकेको छ ।महानगरपालिकाद्वारा स्थापना गरिएको भोजपुरी प्रतिष्ठान नेपालमै पहिलो भोजपुरी भाषा, कला संस्कृतिको उत्थानको लागि स्थापना गरिएको प्रतिष्ठान भएको भोजपुरी साहित्यकार एवं प्रतिष्ठानका अध्यक्ष द्विवेदीले बताउनुभयो ।