राजविराज | अनुसन्धान पूरा हुन नसकेको भन्दै सप्तरी प्रहरीले सरकारी कागज छाप किर्ते र किर्ते नागरिकता मुद्दाका आरोपी वडा सचिवलाई हाजिरी जमानीमा छाडिदिएको छ । मृत्यु भइसकेका, उमेर नपुगेकाको नागरिकतामा केरमेट गरी तथा भारतीयको नक्कली नेपाली नागरिकता बनाई वषौंदेखि सामाजिक सुरक्षा भत्ताको अपचलन गर्दै आएको आरोपमा पक्राउ गरिएका सप्तरीको डाकनेश्वरी–२ का सचिव विनोदकुमार ठाकुरलाई प्रहरीले छोडेको हो ।‘२५ दिन थुनामा राख्यौं, त्यो अवधिमा अनुसन्धान पूरा हुन सकेन,’ डीएसपी माधवप्रसाद काफ्लेले भने, ‘अनुसन्धान पूरा नभएकाले मुद्दा कमजोर हुन सक्ने हुँदा जिल्ला सरकारी वकिल कार्यालयको सहमतिमा हाजिरी जमानीमा वडा सचिवलाई छोडिएको छ ।’ सरकारी वकिल कार्यालयका न्यायाधिवक्ता कैलाश दाहालले प्रहरीले सहमति मागेकाले दिएको बताए ।

डाकनेश्वरी–२ का वडाध्यक्ष मोहम्मद रहमान मियाँ र वडा सचिव ठाकुरसहितका कर्मचारी र जनप्रतिनिधिले सामाजिक सुरक्षा भत्ता दुरुपयोग गर्दै आएको स्थानीयको जाहेरीपछि प्रहरीले वडा सचिव ठाकुरलाई गत साउन २४ मा नियन्त्रणमा लिएको थियो । ४ जनाको यो समूहले आर्थिक वर्ष ०७४/७५ देखि ०७७/७८ सम्म वडाका ७८ जनाको नाममा किर्ते कागजात बनाई सामाजिक सुरक्षा भत्ता उठाउँदै आएको जाहेरीमा उल्लेख छ । हाजिरी जमानीमा वडा सचिवलाई छोडिए पनि वडाध्यक्षसहित प्रतिवादी बनाइएका अन्य तीन जना भने फरार छन् ।

सामाजिक सुरक्षा भत्ता अनियमितता गर्ने नियतले यो समूहले मृत्यु भइसकेका व्यक्तिको नामबाट समेत भत्ता उठाउँदै आएको प्रहरीको प्रारम्भिक अनुसन्धानबाट खुलेको थियो । यसका अतिरिक्त एउटै व्यक्तिको नागरिकताको नम्बरलाई केरमेट गरी फरक–फरक नाम र जन्ममिति राखी सामाजिक सुरक्षा भत्ता पाउने उमेर बनाउने, भारतीय नागरिकको नक्कली नागरिकता बनाई उनको नामको भत्ता उठाउने, वडावासी नै नभएका व्यक्तिको नागरिकता ल्याई जन्ममिति र ठेगाना केरमेट गरी नयाँ जन्ममिति र आफ्नै वडाको ठेगाना राखेर भत्ता उठाउने लगायतका काम उक्त समूहले गर्दै आएको पाइएको छ । पछिल्लो ४ वर्षमा उक्त समूहले सामाजिक सुरक्षा भत्ताको एक करोड रुपैयाँभन्दा बढी रकम अनियमितता गरेको स्थानीयको आरोप छ ।