बारा । नीति तथा कार्यक्रम पारित नहुदैं बाराको करैयामाई गाउँपालिकाले यस आर्थिक वर्षको बजेट दुरुपयोग गरेको छ । असार १० गते भित्र नीति तथा कार्यक्रम गाउँसभाबाट पारित गरेर मात्र आर्थिक गतिविधि गर्न पाइने सरकारी नियम भएपनि गाउँपालिकाका अध्यक्ष भुनेश्वर धामीको निर्देशनमा गाउँपालिकाले १ करोड बराबरको लागतमा सडक निर्माण कार्य अगाडि बढाएको वडा नं. १ वडा अध्यक्ष सोनालाल साहले बताएका छन् ।

गाउँपालिकाको वडा नं. ५ र ७ मा पर्ने ढोरियादेखि पिपरा र पिपरादेखि ढोरियासम्मको बाटो निर्माण कार्य अगाडि बढाएर बजेट दुरुपयोग गरिएपछि गाउँपालिका अध्यक्ष धामीको सर्वत्र आलोचना भएको छ । सरकारी नियमको गाउँपालिकाले धज्जी उडाएको गाउँबासीको भनाई छ ।यस विषयमा गाउँपालिकाका अध्यक्ष भुनेश्वर धामीसँग बुझ्दा उपभोक्ता समिति मार्फत काम भईरहेको तथा ६ सय मिटरको सडक ढलान गर्न दुई वटा उपभोक्ता समिति गठन गरी काम भईरहेको बताए ।

उनले गाउँपालिकाका प्रशासकीय अधिकृतले नियमसंगत ढङ्गले कार्य आदेश दिएको दाबी गरे । गापा अध्यक्ष धामीले गएको आर्थिक वर्षको बाँकी काम १८ नम्बर फाइलमा लगेर गर्न मिल्ने प्रतिक्रिया दिए । तर, गाउँपालिका वडा नं. ५ का वडाध्यक्ष उमेश चौधरीले आफुलाई यसबारे केही थाहा नभएको र आफ्नै वडामा बनाएको उपभोक्ता समितिबारे पनि आफुलाई केही जानकारी नभएको प्रतिक्रिया दिए ।

अध्यक्ष चौधरीले गाउँपालिकाका अध्यक्षले ठाडो शैलीमा नियम मिचेर काम अगाडि बढाएको बताएका छन् । गाउँसभाबाट नीति र कार्यक्रम पारित नभई योजना समेत छनोट भई नसकेको अवस्थामा अध्यक्ष र प्रशासकिय अधिकृतको मिलोमतोमा यस वर्षको बजेट दुरुपयोग भएपछि गाउँपालिकाको बोर्ड सदस्य र कर्मचारीमा चरम असन्तुष्टि रहेको गाउँपालिका श्रोतले जनाएको छ । बजेट दुरुपयोगबारे चरम असन्तुष्टि रहेपनि आफ्नो वडाको बजेट कटौती हुने डर्रले कसैले पनि कुनै प्रतिक्रिया नजनाएको श्रोतको दाबि छ ।

यता, गाउँपालिका वडा नं. २ का वडाध्यक्ष सुरेन्द्र चौधरीले गाउँपालिका अध्यक्ष र प्रशासकिय अधिकृतले कुनै न कुनै नियमलाई टेकेर बजेट प्रयोग गरेको हुनसक्ने बताएका छन् ।यस विषयमाम योजना प्रमुख विरेन्द्र कुशवाहा र वरिष्ठ इन्जिनियर अवधेश प्रसादसँग प्रतिक्रिया लिन खोज्दा प्रष्ट प्रतिक्रिया आएन । उपभोक्ता समिति मार्फत भईरहेको भनिएको भएपनि सडक ढलान ठेकेदार मार्फत भईरहेको स्थानियहरुको भनाई छ ।

स्थानीयहरुका अनुसार गापा अध्यक्ष धामीले आफ्ना आसेपासेलाई उपभोक्ता समिति बनाएकाे भए पनि काम ठेकेदार मार्फत गराएर करोडौँको बजेट दुरुपयोग भईरहेको छ । एकै ठाउँको सडकका लागि करोडौँ बजेट राखेका गापा अध्यक्षले वर्षाको बेलामा पनि जबरजस्ती काम गर्न लगाएर कमसल काम गराएको स्थानीयहरु बताउँछन् ।तर गापा अध्यक्ष धामीले भने इन्जिनियरको इस्टिमेट अनुसार आफै उपस्थित भएर आरसीसी ढलान गराएकाले काम नियम संगत तवरले भएको दाबी गरे ।

यता, प्रमुख प्रशासकिय अधिकृत यादवले भने आर्थिक वर्षको अन्त्य तीर उपभोक्ता समितिले सबै निर्माण सामाग्री खसालेर काम शुरु गरेको भएपनि वर्षाका कारणले काम सम्पन्न नभएको बताए । सोही कामलाई सम्पन्न गर्न म्याद थप गरेर काम सुचारु गरिएको भएपनि गत आर्थिक वर्षमा सम्पन्न नभएका कामलाई बहुवर्षीय योजनामा परिणत गरी बोर्डबाट अनुमोदन गर्न बाँकी रहेको उनले जानकारी गराएका छन् ।

बोर्डले अनुमोदन नगरेको खण्डमा बजेट निकासामा समस्या हुन सक्ने प्रशासकिय अधिकृत यादवको भनाई छ । उनले जनप्रतिनिधीहरुबीच कुरा नमिल्दा गाउँसभा प्रभावित भएको बताउदैं छिट्टै गाउँसभा गर्ने तयारी भईरहेको जानकारी दिए । गत वर्षका निकासा हुन बाँकी रहेका योजनाहरुको सन्दर्भमा बोर्ड बैठकमा प्रस्ताव गरिने र अनुमोदन भए मात्रै भुत्तानी हुने उनले प्रस्ट पारे ।यो समाचार नेपाल पोस्ट डाइली ले लेखेको छ |