वीरगंज । नेपाल दूरसञ्चार प्राधिकरणले नेपालको आफ्नै स्याटेलाइट राख्न ८० करोड रुपैयाँ छुट्याएको छ । सञ्चार तथा सूचना प्रविधि मन्त्रालयबाट हालै मात्र स्वीकृत वार्षिक कार्यक्रममा नेपालको स्याटलाइट राख्न प्रारम्भिक तयारीस्वरुप यो बजेट छुट्याइएको हो ।स्वीकृत कार्यक्रम अनुसार ग्रामीण दूरसञ्चार कोषबाट उक्त परियोजनाका लागि ५० करोड रुपैयाँ विनियोजन गरिएको छ । वार्षिक कार्यक्रममा स्याटलाइट परियोजनाका लागि कार्ययोजना समेत तय गरिएको छ ।

जसअनुसार चालु आर्थिक वर्ष २०७८/७९ को तेस्रो त्रैमासिक अर्थात् आउँदो चैत मसान्तसम्म स्याटलाइट लञ्चिङ र ग्राउण्ड स्टेसन स्थापनाका लागि बोलपत्र प्रकाशन गर्ने र असार मसान्तसम्म त्यसका लागि योग्य संस्था छनौट गरिसक्ने लक्ष्य छ । बोलपत्र आह्वानका लागि २० करोड र संस्था छनौटका लागि ३० करोड रुपैयाँ बजेट राखिएको छ ।

त्यसैगरी नेपालको आफ्नै स्याटलाइट स्थापना गर्न विकास कार्यक्रम अन्तर्गत आवश्यक ऐन तथा नियम बनाउने योजना समेत वार्षिकार्यक्रममा समावेश छ । जसका लागि २० करोड रुपैयाँ बजेट छुट्याइएको छ ।त्यसो त नेपालको स्याटलाइट राख्ने परियोजना नयाँ भने होइन । लामो समयदेखि यसको चर्चा चल्दै आएको र सरकारले समेत कार्यक्रमका लागि बजेट समेत छुट्याउँदै आएको छ । तर कार्यान्वयनको दिशामा भने सन्तोषजनक प्रगति हुन सकेको छैन ।