वीरगन्ज । जिल्ला प्रहरी कार्यालय सप्तरीले एक वर्षमा १ हजार भन्दा बढी फरार अभियुक्तलाई पक्राउ गरेको छ । विभिन्न घटनामा संलग्न रही फरार रहेकालाई पक्राउ गरिएको जिल्ला प्रहरी कार्यालय सप्तरीले जनाएको छ ।
आर्थिक वर्ष २०७८÷७९ मा अदालतबाट फैसला भई फरार रहेकाहरुलाई फैसला कार्यान्वयन गराउने क्रममा १ हजार १४९ जनालाई पक्राउ गरिएको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक माधव प्रसाद काफ्लेले जानकारी दिए ।
उनीहरु कर्तव्य ज्यान, हाडनाता करणी, लागूऔषध, सवारी ज्यान, चेक अनादर, अंशबन्डा, सम्बन्ध विच्छेद, कुटपिट र लुटपाट मुद्दामा संलग्न रहेको उनले बताए ।
फौजदारी मुद्दाका २०१ र देवानी मुद्दाका ९४८ जना अदालतबाट सजाय पाएर फरार भएको डिएसपी काफ्लेले जानकारी दिए ।
पक्राउ परेका हरुबाट १ करोड १९ लाख ५४ हजार ८१६ रुपैयाँ राजश्व असुल गरिएको र तिनीहरुबाट २४२ वर्ष ५ दिन कैद भुक्तान गराइने उनले बताए ।
त्यस्तै चालु आर्थिक वर्षमा भन्सार छली गरेर ल्याइएका ३ करोड १७ लाख ५९ हजार १७६ मूल्य बराबरको अवैध किराना, लत्ताकपडाहरू, सवारी साधन, मदिराजन्य, विद्युतिय सामग्री लगायतका सामानहरु बरामद गरिएको प्रवक्ता काफ्लेले बताए ।
यस अवधिमा तस्करीमा संलग्न १२४ जनालाई पक्राउ गरी कारवाही समेत गरिएको डिएसपी काफ्लेले जानकारी दिए ।
