वीरगन्ज । युनियन लाइफ इन्स्योरेन्सको आइपिओमा साढे २१ लाखभन्दा बढीको आवेदन परेको छ । यो आइपिओमा परेको हालसम्मकै उच्च आवेदन हो ।बिक्री प्रबन्धक प्रभु क्यापिटलले दिएको जानकारी अनुसार सोमबार सम्ममा २१ लाख ५० हजार ४७८ जना आवेदकबाट ३ करोड ४० लाख १० हजार ८९० कित्ता सेयर खरिदका लागि आवेदन दिएका छन् ।

यसमा अझै बैंकमार्फत आइपिओ भर्नेहरूको आवेदन थप हुने भएकाले आवेदनको संख्या अझै बढ्न सक्छ।

कम्पनीले कुल जारी पुँजी २ अर्ब १५ करोड रुपैयाँको ३० प्रतिशतले हुन आउने ६४ करोड ५० लाख रुपैयाँ बराबरको ६४ लाख ५० हजार कित्ता सेयर निष्काशनमा ल्याएको हो । त्यसमध्ये ५ प्रतिशत अर्थात् ३ लाख २२ हजार ५०० कित्ता कर्मचारीलाई र अर्को ५ प्रतिशत सामूहिक लगानी कोषलाई सुरक्षित गरी बाँकी ५८ लाख ५ हजार कित्ता सेयर सर्वसाधारणका लागि बिक्रीमा ल्याएको थियो ।