वीरगन्ज । चीनका वैज्ञानिकहरूले पृथ्वीसँग ठोकिन आएको एक क्षुद्रग्रहलाई अन्तै हटाउनका लागि अन्तरिक्षमा २० भन्दा बढी रकेटहरू प्रहार गर्ने योजना बनाएको छ । बेन्नु नामक उक्त क्षुद्रग्रह लगभग ९ करोड टन तौल भएको अन्तरिक्ष पत्थर हो । त्यो पृथ्वीको कक्षको ७५ लाख किलोमिटर नजिक आउन लागेको छ ।

त्यसो त बेन्नु पृथ्वीमा आएर ठोकिने सम्भावना न्यून छ तर त्यो ठोकियो भने चाहिँ प्रलय आउनेछ । बेन्नु पृथ्वीमा ठोकिएमा आउने काइनेटिक ऊर्जा १२ सय मेगाटन हो । हिरोशिमामा खसाइएको अणुबमभन्दा त्यो लगभग ८० हजार गुणा बढी हो ।  प्राचीनकालमा पृथ्वीबाट डाइनासोर सोत्तर पार्ने क्षुद्रग्रहले १० करोड मेगाटन ऊर्जा पठाएको थियो ।

चीनको नेसनल स्पेस साइन्स सेन्टरल ९९२ टन तौल भएका २३ वटा लंग मार्च ५ रकेटहरूले एकैपटक क्षुद्रग्रहलाई धकेल्दा त्यो पृथ्वीभन्दा लगभग नौ हजार किलोमिटर पर धकेलिने अनुमान गरेको छ ।उनीहरूको गणना आइक्यारस नामक जर्नलको आगामी नोभेम्बर इस्युमा प्रकाशन गरिन लागेको छ ।