वीरगन्ज । पर्सा — गण्डक नहरमा नेपाल र भारत दुवैतर्फ क्षति पुग्दा नहरमा पानी आउन अझै कम्तीमा दुई साता लाग्ने भएको छ । डेढ साताअघि भारी वर्षासँगै खोलाहरुमा जलस्तर बढ्दा गण्डक नहरमा नेपालतर्फ मात्र नभई भारततर्फ पनि क्षति पुगेको थियो ।
भारतको भवल गाउँनजिक गण्डक नहरको १ सय ६० आरडीमा डेढ साता अघि गण्डक नरहमा भएको क्षति । तस्बिर सौजन्य : सुवाेध कुशवाहा
नारायणी सिँचाइ व्यवस्थापन कार्यालयका सूचना अधिकृत इन्जिनियर सुबोध कुशवाहाका अनुसार पर्साको जगरनाथपुर गाउँपालिकास्थित जानकीटोलामा रहेको नेपाल–भारत सीमाबाट करिब २० किमि पश्चिममा भारतीय भूमिको नहरमा क्षति पुगेको हो । ‘त्यहाँस्थित नहरको १ सय ६० आरडीमा भवल गाउँनजिक नहरको दोन ब्रान्चअन्तर्गत खण्डमा यो क्षति भएको हो,’ उनले भने, ‘मसान खोलामा आएको बाढी नहरमा प्रवेश गर्दा त्यहाँ २ स्थानमा गरी नहरको देब्रेतर्फको करिब ४० मिटर खण्ड कटान गरेको छ ।’ भारतीय पक्षले उक्त स्थानमा मर्मतसम्भार गर्न डेढदेखि २ साता समय लाग्ने जानकारी गराएको उनले बताए ।
यस वर्ष नेपालतर्फ गण्डक नहरमा तालिकाअनुरूप नै पानी दिन भारत तयार रहे पनि नेपालतर्फ धानको बीउ तयार भइनसकेको र प्राकृतिक वर्षा पनि पर्याप्त भएकाले नहरमा तत्काल पानी नछोड्न कार्यालयले भारतीय पक्षलाई आग्रह गरेको इन्जिनियर कुशवाहाले बताए । दुवैतर्फ नहरको मर्मत भइसक्दासम्म नेपालतर्फ पानीको आवश्यकता पर्ने समय पनि करिब उत्ति नै हुन जाने उनले बताए । ‘हाल पनि भारतीय भूमिमा नहरमा पानी उपलब्ध छ,’ उनले भने, ‘जति बेला माग्यो, त्यति बेलै पानी उपलब्ध हुन सक्ने भारतीय पक्षले बताएको छ ।’
भारतसँगको सम्झौताअनुसार बर्सेनि धान सिजनका लागि असार १५ र गहुँ सिजनका लागि पुस १० देखि नहरमा पानी आइसक्नुपर्छ । गण्डक नहरबाट पर्सा, बारा र रौतहट गरी तीन वटा जिल्लामा ३७ हजार ४ सय हेक्टर जग्गा सिञ्चित गर्ने लक्ष्य भए पनि लामो समयदेखि भारतले सम्झौताअनुरूपको ८ सय ५० क्युसेक पानी नेपाललाई दिएको थिएन । २ वर्षयता भने भारतीय पक्षले सम्झौताअनुरूपकै परिमाणमा पानी दिएको छ ।
