वीरगन्ज । अमेरिकाले नेपाल सरकारलाई कोभिड–१९ विरुद्धको १५ लाखभन्दा बढी मात्रा खोप अनुदान सहयोग दिएको छ ।अमेरिकाले अनुदान सहयोग दिएको १५ लाख ३४ हजार ८५० मात्रा जोन्सन एन्ड जोन्सन खोप सोमवार नेपाल आइपुगेको हो ।ADVERTISEMENT
नेपालका लागि अमेरिकी राजदूत र्याण्डी बेरीले त्रिभुवन अन्तर्राष्ट्रिय विमानस्थलमा एक कार्यक्रमबीच स्वास्थ्य तथा जनसंख्या मन्त्री कृष्णगोपाल श्रेष्ठलाई अमेरिकी सरकारले कोभ्याक्स सुविधा अन्तर्गत नेपाल सरकारलाई दिइएको जोन्सन एन्ड जोन्सन खोप हस्तान्तरण गरे ।
कार्यक्रममा बोल्दै स्वास्थ्य मन्त्री श्रेष्ठले अमेरिका सरकारले नेपाललाई दिएको खोप नेपाली जनताको जीवन रक्षाका लागि बरदान हुने बताए । प्राप्त भएको खोप प्राथमिकताको आधारमा जोखिम समूहलाई दिने गरी छिट्टै खोप अभियान सञ्चालन गरिने उनले बताए ।
उनले भने, ‘आज प्राप्त भएको खोप प्राथमिकताको आधारमा जोखिम समूहका व्यक्तिहरूलाई तथा ५०–५४ वर्ष उमेर समूहका व्यक्तिलाई लगाउने गरी योजना बनाएका छौं । यसका लागि स्वास्थ्य सेवा विभागको प्राविधिक टोली तयारीमा जुटेको छ । छिट्टै खोप अभियान सञ्चालन गरिने छ ।’
मन्त्री श्रेष्ठले कोभिड–१९ संक्रमणको शुरूआती चरणदेखि नै अमेरिकी सरकारले भेन्टिलेटर, परीक्षण किट, व्यक्तिगत सुरक्षा सामग्री लगायतको सहयोग गरेको भन्दै अमेरिकी सरकार, जनता र दूतावासप्रति आभार व्यक्त गरे ।
खोप सहयोग हस्तान्तरण गर्दै नेपालका लागि अमेरिकी राजदूत र्यान्डी बेरीले खोप अमेरिकी जनताको तर्फबाट उपहार स्वरूप दिएको बताए । अमेरिकी सरकारले खोप कुनै काम लिन वा सुविधा पाउनका लागि नदिएको उनले स्पष्ट पारे । नागरिकको जीवनरक्षाका लागि खोप सहयोग दिइएको उनले बताए ।
‘यो अमेरिकी जनताको तर्फबाट उपहार हो । आज आइपुगेको एक मात्रा मात्र लगाए पुग्ने यो खोप नेपालको १५ लाखभन्दा बढी मानिसहरूलाई कोभिड–१९ को घातक प्रभावबाट जोगाउनको निम्ति पर्याप्त हुनेछ । हामीले यो खोप कुनै काम लिन वा सुविधा पाउनका लागि दिएका होइनौं । हाम्रो खोपमा कुनै स्वार्थ लुकेको छैन । हाम्रा शर्त खुला र पारदर्शी छन् ः जीवनरक्षाको एक मात्र उद्देश्यसहित हामीले यो काम गरेका हौं,’ उनले भने ।
राजदूत बेरीले कोभिड–१९ को प्रतिकार्यका लागि अमेरिकी सरकारले नेपाल सरकारलाई हालसम्म ७ करोड डलरभन्दा बढी सहयोग गरिसकेको पनि उल्लेख गरे । आगामी दिनमा पनि नेपाली जनताको जीवन रक्षाको लागि अमेरिकी सरकार साथमै रहेको उनले बताए ।प्राप्त भएको जोन्सन एन्ड जोन्सन खोप एक मात्रा मात्रै लगाए पुग्ने बताइएको छ ।
