वीरगञ्ज | सरकारले बंगलादेशबाट खरिद गरेको ४५ हजार मेट्रिक टन युरिया मल नेपाल आइपुगेको छ। बंगलादेशबाट खरिद गरिएको उक्त परिमाणको मल वीरगञ्ज, विराटनगर र भैरहवा नाका हुँदै नेपाल आइपुगेको हो।वीरगञ्जसहित विराटनगर, भैरहवा नाका भएर ४५ हजार मेट्रिक टन मल आएको र बाँकी मलहरु विराटनगर नाका भएर आउने क्रममा रहेको कृषि सामाग्री कम्पनी लिमिटेड प्रादेशिक कार्यालय वीरगञ्जले जनाएको छ।मल नेपाल आइपुगेसँगै वीरगञ्ज कार्यालयबाट अहिले धमाधम मल वितरण गर्ने कार्य चलिरहेको छ। प्रदेश नम्बर २ का जिल्लाहरुसँगै बागमती प्रदेश र गण्डकी प्रदेशमा समेत कम्पनीको वीरगञ्जस्थित प्रादेशिक कार्यालयले मल उपल्बध गराउने गरेको छ।
मल बंगलादेशबाट कम्पनीको गोदाममा आइसकेकोले सो मललाई अहिले आवश्यक परेको स्थान तथा जिल्लाका कृषि सहकारी संस्थाहरुलाई वितरण गरिरहेको कृषि सामाग्री कम्पनी लिमिटेड प्रादेशिक कार्यालय वीरगञ्जका प्रमुख गोरखनाथ केसीले जानकारी दिए।गोदाममा मल स्टक रहेकोले रोपाइँको लागि सहकारीहरुले मल लगिरहेको उनले बताए। ‘बंगलादेशबाट आएको मल अहिले कार्यालयले प्रदेश २ का जिल्लाहरुसहित बागमती, गण्डकी प्रदेशमा पनि पठाइरहेका छौँ,’ उनले भने, ‘बाँकी रहेको ५ हजार मेट्रिक टन मल पनि विराटनगर नाकाबाट आउनेक्रममा छ।’हरेक वर्ष किसानहरुले मलको अभाव खेप्दै आएको भएपनि अहिले भने मलको अभाव खेप्नु नपर्ने कम्पनीको दाबी छ। रोपाइँको बेलामा अहिले मलको खासै अभाव नदेखिएकोले किसानहरुको लागि खुशीको कुरा भएको किसान हकहित संघर्ष समिति पर्साका अध्यक्ष सहरुम राउत गदीको भनाइ छ।
तर, अहिले मलको अभाव नदेखिए पनि पछि गएर अभाव सिर्जना हुने हो अथवा सहकारीहरुले नै कृत्रिम अभाव सिर्जना गरेर दुःख दिनसक्ने भन्दै यसमा सम्बन्धित निकायले अनुगमन गर्नुपर्ने आवश्यकता रहेको गदीले बताए।‘किसानहरु हरेक वर्ष मलको हाहाकार खेप्दै आएका छन्। यसपाली रोपाइँको बेलामा मल भने पाइएको छ,’ उनले भने, ‘तर अहिलेको लागि मात्र नभइ पछिसम्मको लागि पनि यस्तै सहज रुपमा मल उपल्बध हुनु पर्यो।’कृषि सामग्री कम्पनी लिमिटेड प्रादेशिक कार्यालय वीरगञ्जले मंगलबारसम्म युरिया मल ९ हजार ५ सय ६१ मेट्रिक टन बिक्री गरेको छ भने मौज्दातमा २ हजार ४ सय ८८ मेट्रिक टन रहेको छ।यस्तै कार्यालयले डिएपी ५ हजार ६७ मेट्रिक टन बिक्री गरेको छ भने मौज्दातमा ७ हजार १ सय ३३ मेट्रिक टन रहेको कार्यालयले जानकारी दिएको छ। यसबीचमा पोटास ४ सय ७८ मेट्रिक टन बिक्री भएकोमा मौज्दातमा ७ सय २८ मेट्रिक टन रहेको कम्पनीको प्रादेशिक कार्यालयले जनाएको छ।deshsanchar
