चितवन । जिल्ला प्रशासन कार्यालय चितवनले निषेधाज्ञा खुकुलो बनाएसँगै जिल्लामा कोरोना संक्रमण बढ्न थालेको छ ।असार लागेपछि सक्रिय संक्रमितको संख्या असार १३ गते एक हजार १४ मा झरेको चितवनमा बुधबारसम्म आइपुग्दा सक्रिय संक्रमितको संख्या २८७ ले वृद्धि भएर एक हजार ३०१ पुगेको छ ।

चितवनमा पछिल्लो २४ घण्टामा १३५ जना संक्रमित थपिएका छन् भने एक जनाको मृत्यु भएको छ । ६२६ जनाको कोरोना परीक्षण गर्दा १३५ जनामा संक्रमण देखिएको हो । पछिल्लो २४ घण्टामा १०४ जना संक्रमणमुक्त भएको स्वास्थ्य कार्यालय चितवनले जानकारी दिएको छ ।

प्रशासनले निषेधाज्ञालाई केही खुकुलो बनाएसँगै मानिसहरुको भिडभाड बढ्न थालेको छ । अघिल्लो साता नीजि सवारी साधान सञ्चालनमा जोर विजोर लागु गरेको प्रशासनले विहिवारदेखि सार्वजनिक सवारी साधानसमेत जोर विजोर लागू गरेर सञ्चालन गर्न दिने भएसँगै कोरोनाको दर अझै बढ्न सक्ने देखिएको छ ।

चितवनमा गत जेठमा संक्रिय संक्रमितको संख्या निकै बढी थियो । जेठको दोस्रो साता सक्रिय संक्रमितको संख्या ४ हजार ७ सय १३ पुगेको थियो । असार पहिलो हप्ताबाट घट्दै गएको संक्रमितको संख्या असार तेस्रो साता आईपुग्दा पुनः बढ्न थालेको छ ।

स्वास्थ्य कार्यालय चितवनका अनुसार असार ५ गते यस वर्षको कम २.१० प्रतिशत संक्रमित रहेकोमा असार १९ गते र २० गते २७.२४ प्रतिशत प्रतिशत रहेको छ । आज बुधवार संक्रमणको दर २१. ५६ प्रतिशत छ ।जिल्लाका अस्पतालहरुमा २३० जना संक्रमितको उपचार भईरहेको छ । ती मध्ये ७६ जना सघन उपचार कक्षमा, १७ जना भेन्टिलेटरमा, ४४ जना एचडियुमा र ११० जना सामान्य शैयामा उपचाररत छन् । भरतपुर अस्पताल, चितवन मेडिकल कलेज, कलेज अफ् मेडिकल साइन्सेस् भरतपुर, क्यान्सर अस्पताल भरतपुरमा कोराना संक्रमित बिरामीहरुको उपचार हुँदै आएको छ ।

जिल्लामा हालसम्म २८८ जनाको कोरोना संक्रमणका कारण मृत्यु भएको छ । कूल संक्रमितको संख्या १६ हजार ९९८ पुगेको छ । स्वास्थ्य कार्यालय चितवनका प्रमुख दीपकप्रसाद तिवारीले कार्यालय प्रमुख तिवारी निषेधाज्ञा खुकुलो हुँदै जाँदा संक्रमित बढ्दै जाने बताए ।उनले जनताको सहजताका लागि निषेधाज्ञा खुकुलो बनाइएको भए पनि स्वास्थ्य सुरक्षाका मापदण्ड सबैले अपनाउनुपर्ने बताए ।