बिरगंज। कहिलेकाहीँ हामी यस्ता व्यक्तिको सामना गर्छौं जसलाई असाध्यै धेरै बोलिरहनुपर्छ । कुनै पनि विषयमा आवश्यकताभन्दा बढी र निरन्तर बोलिरहने मानिसले अरूलाई विचार राख्ने अवसर दिँदैन ।

तपाईं आफैंमा पनि यस्तो नराम्रो बानी हुनसक्छ । यो बानीका कारण मानिसहरू तपाईंबाट टाढिएका हुनसक्छन् । यो समस्याबाट मुक्ति पाउन तपाईंको मन दह्रो हुनुपर्छ । यहाँ केही टिपहरू छन् ।

सजिलो छ भन्नुस्
तपाईंले धेरै बोल्ने बानी छुट्दैन भन्ने धारणा राख्नुभएको होला । तर म यो बानी हटाउँछु भनी दिनदिनै प्रयास गर्दा तपाईंले सुपरिणाम पाउनुहुन्छ । सकारात्मक सोच राख्नुस् र निरन्तर प्रयासका लागि तयार रहनुस् ।

चुप लाग्ने अभ्यास
धेर बोल्ने बानीबाट छुटकाराका लागि चुप लाग्न थाल्नुस् । कुनै विषयमा तपाईंको विचार मागियो भने कम शब्दमा आफ्नो कुरा राख्ने कोशिश गर्नुस् । शुरुमा त तपाईंलाई अलि गाह्रै पर्छ तर बिस्तारै तपाईं यसमा अभ्यस्त हुनुुहुनेछ ।

सुन्न थाल्नुस्
धेर बोल्ने धुनमा तपाईंले अर्काको कुरा सुन्ने आवश्यकता नै ठान्नुहुन्नथियो पहिला । अर्कालाई कुरा राख्न पर्याप्त अवसर दिनुस् अब । चुप लागेर अर्काको कुरा सुन्ने बानी बसाल्नुस् । त्यसपछि तपाईंले अर्को व्यक्तिको कुराको महत्त्व थाहा पाउनुहुन्छ । यसबाट तपाईंमा संयमको गुण पनि विकसित हुन थाल्छ र तपाईंलाई फाइदा हुन्छ ।

बहस गर्न रोक्नुस्
कुराकानीको सामान्य माहोलमा तपाईं कम बोल्न सफल भएपनि कुनै मुद्दामा असहमति हुनासाथ बहस गर्नका लागि आफैंलाई रोक्न सक्नुहुन्न । यस्तो अवस्थामा संयम कायम राख्नुस् र हरेक सानाठूला कुरालाई बढाइचढाइ गर्नुभन्दा धैर्यका साथ सुन्नुस् र सीमित शब्दमा कुरा राख्नुस् ।

शब्द छनोट
धेर बोल्ने बानीबाट छुटकारा पाउनका लागि शब्दको छनोट सही हुनुपर्छ । आफूअघि बसेको मानिससम्म आफ्नो मन्तव्य स्पष्ट तरिकाले पु–याउनका लागि अनि आफ्नो शब्दले अरूलाई ठेस नपु–याउनका लागि ध्यान दिनु जरूरी हुन्छ ।

बोल्नुअघि सोच्ने
अहिलेसम्म तपाईंको सारा ध्यान कुरा गर्नमा हुन्थ्यो भने अबदेखि बोल्नुअघि आफ्ना विचारका बारेमा सोच्न शुरु गर्नुस् । तपाईंले भन्न खोजेका कुरा आवश्यक वा अति महत्त्वपूर्ण छन् त ? यो प्रश्न आफैंसँग गर्नुस् र महत्त्वपूर्ण कुरा मात्र बोल्नुस् । यसो गर्दा तपाईं अनावश्यक कुरा बोल्नबाट बच्नुहुन्छ र यो अभ्यासले तपाईंलाई धेर बोल्ने बानी छुटाउन सहायता गर्छ ।

एजेन्सी