आज:

जालिम मियाँमाथि बलत्कारको घटना पञ्चायती गरेर मिलाएको आरोप

वीरगंज संजाल

२३ जेष्ठ २०७८, आईतवार १९:१३

१५५४५

बिरगंज। पर्साको जगरनाथपुर गाउँपालिकाका अध्यक्षमाथि बल्त्कारीलाई भगाएर पञ्चायती मार्फत घटना मिलाउन खोजेको आरोप लागेको छ ।गाउँपालिका अध्यक्ष जालिम मियाँमाथि १५ वर्षीय बालिकाको बलत्कार गरेका पीडकलाई भगाएको आरोप लागेको हो । मियाँले घटनालाई दबाउन पञ्चायती समेत गरेको स्थानीयले बताएका छन् ।

शनिबार साँझ गाउँपालिकाको वडा नम्बर ४ स्थित जगरनाथपुर गाउँकी बालिकालाई स्थानीय २२ वर्षीय युवकले जबरजस्ती करणी गरेका थिए । स्थानीय अनुसार बालिकाका अभिभावक घर बाहिर गएको मौका छोपी युवकले घरभित्र पसेर करणी गरेका थिए ।

करणीको घटना बाहिरीएपछि गाउँपालिका अध्यक्ष मियाँको अगुवाइमा पीडकलाई भगाइएको र पञ्चायती गरेर घटना मिलाउन खोजिएको नाम नबताउने सर्तमा एक गाउँलेले बताए । सोही टोलमै बस्ने गाउँपालिका अध्यक्ष मियाँले पञ्चायती गरेर घटना मिलाउन खोजिरहेको भन्दै बालिकाका दाईले प्रहरीलाई खबर गरेपछि राति करिब साढे ८ बजे तिर प्रहरी गाउँ पुग्दा मियाँले स्थानीयलाई उचालेर प्रहरीको विरोधसमेत गराएको स्थानीयको भनाई छ ।

गाउँमा प्रहरी पुग्दा आफ्नै घरमा लुकेर बसेका पीडक युवक विरोध गर्ने क्रममा होहल्ला भएपछि त्यसको मौका छोपी उनलाई भगाइएको गाउँलेको भनाई छ । जिल्ला प्रहरी कार्यालय पर्साका प्रवक्ता एवम् प्रहरी नायव उपरीक्षक (डिएसपी) ओमप्रकाश खनालका अनुसार जागरनाथपुरमा बलत्कार भएको घटनाको जानकारी आएपनि अहिलेसम्म त्यस सम्बन्धमा कुनै उजुरी परेको छैन ।

डिएसपी खनालले बलत्कार भएको भन्ने बारे जानकारी पाएलगतै प्रहरी घटनास्थलमा पुग्दा पीडक भनिएको युवक फरार रहेको र पिडित युवतीलाई मेडिकलका लागि गाउँलेले ल्याउन नदिएको बताए । युवतीलाई मेडिकलका लागि प्रहरीमा उपस्थित गराउन गाउँलेलाई आग्रह गरिएपनि अहिलेसम्म कोही नआएको उनले प्रतिक्रिया दिए ।यता, गाउँपालिका अध्यक्ष मियाँले आफूमाथि लागेको सबै आरोप गलत र निराधार भएको बताएका छन् । उनले विपक्षिहरुले आफुलाई बद्नाम गराउन यस्तो षडयन्त्र गरेको आरोपसमेत लगाए ।

मियाँले बलत्कारको घटनै नभएको दावी गरेका छन् । उनले भने, ’बलत्कार भएको हल्ला मात्र भएको हो । त्यस्तो केही भएको छैन ।’ मियाँका अनुसार युवक र युवती बीच लामो समयदेखि प्रेम सम्बन्ध थियो । उनले बलात्कारमा परेको भनिएकी बालिकाको उमेर २० वर्ष रहेको बताए । उनले भने, ‘बालिकाको उमेर २० वर्ष छ र केटासँग विवाह गर्ने दुवै परिवारले निर्णय गरेका हुन् । हामीले पञ्चायती गरेकै छैनौँ ।’