वीरगंज । जनता समाजवादी पार्टी (जसपा) भित्र चर्किएको विवाद समाधानका लागि शीर्ष तहमा संयुक्त बैठक गरेर पार्टीमा छलफल चलाउने निर्णय अध्यक्ष उपेन्द्र यादव पक्षले गरेको छ ।शनिवार पार्टी कार्यालय बालकुमारीमा बसेको उपलब्ध केन्द्रीय कार्यकारिणी समिति सदस्यहरूको अनौपचारिक बैठकले पार्टीका बैठकहरू बोलाउन शीर्ष तहमा अपिल गर्ने निर्णय गरेको हो ।

पार्टीको ५१ सदस्यीय कार्यकारिणी समिति बैठक र ८०१ सदस्यीय केन्द्रीय समिति बैठक जूममार्फत राख्न आग्रह गरिने नेता राईले बताए । ‘पार्टीलाई लामो समयसम्म अनिर्णयको बन्दी बनाउनु हुँदैन । पार्टीका बैठक राखेर सहमति भए सहमतिमा र नभए बहुमतीय आधारमा निर्णय गर्नुपर्छ,’ उनले भने ।

अध्यक्ष उपेन्द्र पक्षले पार्टीमा आफ्नो बहुमत रहेको दाबी गरेको छ । ५१ सदस्यमध्ये शनिवारको बैठकमा २८ कार्यकारिणी सदस्य उपस्थित रहेका नेता राईले दाबी गरे । पार्टीमा अध्यक्ष महन्थ पक्षले पनि आफ्नो बहुमत रहेको दाबी गर्दै आएको छ ।

शनिवारको बैठकले नयाँ सरकार गठनको प्रयास भइरहेका बेला सांसदहरूलाई भक्तपुरको रिसोर्टमा थुनिएकोप्रति आपत्ति जनाएको छ । जसपा कार्यकारिणी सदस्य तथा सांसद रामसहाय यादवले उपलब्ध कार्यकारिणी सदस्यको अनौपचारिक बैठकबाट सांसदलाई थुनिएको घटनाको घोर भर्त्सना गर्ने निर्णय भएको जानकारी दिए ।

शनिवार उपेन्द्र पक्षले पार्टी कार्यालय बालकुमारीमा उपलब्ध कार्यकारिणी सदस्यको बैठक गरेको छ । बैठकले अर्का अध्यक्ष महन्थ ठाकुर पक्षले वरिष्ठ नेता राजेन्द्र महतोलाई संसदीय दलको नेता चुनेको भनेर गरिएको प्रचारलाई विधान विपरीत ठहर गरेको छ ।

‘त्यो निर्णय पार्टी र संसदीय दलको विधान विपरीत रहेको छ, यसबारे कुनै निर्णय नभएको भनेर संसद सचिवालयलाई ध्यानाकर्षण गराउने निर्णय भएको छ,’ यादवले लोकान्तरसँग भने ।

बैठकपछि केन्द्रीय कार्यकारिणी समिति सदस्य प्रकाश अधिकारीले विज्ञप्ति जारी गर्दै संसदीय दलको नेता नचुनिएको बताएका छन् । उनले पार्टीको विधान समेत नबनेको र संसदीय दलको बैठक पनि नबसेको स्पष्ट पारेका छन् ।बैठकबारे अर्का अध्यक्ष महन्थ ठाकुर पक्षलाई कुनै जानकारी गराइएको थिएन । ठाकुरले प्रेस विज्ञप्ति जारी गरेर जसपाको कुनै बैठक नरहेको दाबी गरेका थिए ।