वीरगंज | प्रदेश २ मा थप १३१ जनामा कोरोना संक्रमण पुष्टि भएको छ।प्रादेशिक जनस्वास्थ्य प्रयोगशाला जनकपुरधाम, गौर अस्पताल रौतहट र नारायणी अस्पताल वीरगन्जमा शनिबार गरिएको परीक्षणमा १३१ जनामा कोरोना संक्रमण पुष्टि भएको स्वास्थ्य निर्देशनालय प्रदेश २ का वरिष्ठ चिकित्सक डा. कमलेशप्रसाद यादवले जानकारी दिए।
पर्सामा शनिबार सबैभन्दा बढी ६६ जनामा कोरोना संक्रमण पुष्टि भएको छ। यस्तै रौतहटमा ३२, धनुषामा १६, बारामा १२, महोत्तरीमा ४ र सिरहामा १ जनामा कोरोना संक्रमण पुष्टि भएको छ।
यससँगै प्रदेशमा संक्रमितको संख्या १८ हजार २ सय ६५ पुगेको छ। प्रदेशमा सक्रिय संक्रमितको संख्या पुनः एक हजार नाघेको छ। संक्रमित थपिएसँगै सक्रिय संक्रमितको संख्या १ हजार ५० पुगेको स्वास्थ्य निर्देशनालयले जनाएको छ।
जसमा १ हजार ६ जना होम आइसोलेसनमा छन् भने ४४ जना संस्थागत आइसोलेसनमा छन्। कोरोना संक्रमणबाट हालसम्म यस प्रदेशमा २ सय १७ जना संक्रमितको मृत्यु भएको स्वास्थ्य निर्देशनालयले जनाएको छ।