वीरगन्ज । चितवन र पर्साको संरक्षित क्षेत्रमा लागेको आगोका कारण काठमाडौं उपत्यका र आसपासका क्षेत्रको आकाश बाक्लो धुवाँले छोपिएको छ।काठमाडौं उपत्यका सोमबार मध्याह्न एकाएक बाक्लो धुवाले छोपियो। यस्तै धुवाँले उपत्यकासँगै बागमती प्रदेशको पहाडी क्षेत्र ढाकिएको थियो।

यसको कारण थियो, तराईका जंगलमा लागेको आगो। चितवन राष्ट्रिय निकुञ्ज र पर्सा वन्यजन्तु आरक्षमा आगलागी हुँदा हावाले त्यहाँको धुवाँ उडाएर काठमाडौं तथा आसपासका क्षेत्रमा पुर्‍याएको थियो।

चितवन र पर्सा लगायतका क्षेत्रमा लागेकाे आगाे। तस्वीर : एफआईआरएमएस/नासा
अमेरिकी अन्तरिक्ष एजेन्सी नासाको एफआईआरएमएस (फायर इन्फर्मेसन फर रिसोर्स म्यानेजमेन्ट सिस्टम)ले खिचेको स्याटेलाइट तस्वीरमा पनि चितवन र पर्सालगायतका क्षेत्रमा आगलागी भएको देखिएको छ। त्यस्तै, बर्दिया, सुर्खेत र पहाडी क्षेत्रका केही जिल्लामा पनि आगलागी भएको तस्वीरमा देखिएको छ।

काठमाडाैं र पाेखरा लगायतकाे पहाडी क्षेत्रकाे आकाशमा देखिएकाे धुवाँ। तस्वीर : एफआईआरएमएस/नासा
त्यस्तै, नासाको अर्को तस्वीरमा बागमती प्रदेशको हिमाली क्षेत्रमा निलो धुँवा देखिएको छ। यस्तो धुवाँ काठमाडौंसँगै पोखरा र आसपासका क्षेत्रमा पनि देखिएको छ।

साेमबार पाटनमा मापन गरिएकाे वायुकाे गुणस्तर (एक्यूआई)। तस्वीर: कुन्द दीक्षित
यतिबेला तराईका संरक्षित क्षेत्रमा मध्यवर्ती क्षेत्रका बासिन्दा घास तथा दाउरा संकलन गर्छन्। संरक्षित क्षेत्रले केही समयका लागि घास तथा दाउरा संकलन गर्न अनुमति दिनेको गरेको छ।

घास तथा दाउराका लागि संरक्षित क्षेत्रभित्र प्रवेशका गरेका स्थानीय वासिन्दाले आगो लगाउने गरेका छन्। त्यहि कारणले चितवन राष्ट्रिय निकुञ्ज, पर्सा वन्यजन्तु आरक्ष र आसपासका जंगलमा आगलागी भएको छ।

तराई जंगलमा आगो लाग्दा हावाले त्यहाँको धुँवा उत्तररित बडार्ने गर्छ। त्यहि क्रममा चितवन र पर्साको धुँवा काठमाडौं र आसपासको क्षेत्रमा पुगेको हो।

जसले गर्दा काठमाडौंमा वायु प्रदूषण बढेको थियो। सोमबार अपराह्न ४ बजे काठमाडौंको वायु गुणस्तरको सूचकांक (एक्यूआई) ४२१ रहेको थियो। यो विश्व स्वास्थ्य संगठन (डब्लूएचओ)ले तोकेको मापदण्डभन्दा १० गुणा बढी हो।