रौतहटमा कटुवा पेस्तोलसहित एक युवकलाई प्रहरीले पक्राउ गरेको छ । भारत बिहार सीतामढी थाना बरगैनिया, मुसहर चोक बस्ने २१ वर्षीय युवक नितेशकुमार पटेललाई पक्राउ गरेको हो ।
पटेललाई राजदेवी नगरपालिका ८ लक्ष्मीपुर स्थित नेपाल भारत सिमाको दशगजा नजिकै प्रहरी चौकी बेलबिछुवा र सशस्त्र प्रहरी बल बिओपी बेलबिछुवाको टोलीले पक्राउ गरेको जिल्ला प्रहरी कार्यालय रौतहटले जनाएको छ ।
दाहिने तिघ्रामा लुकाएर ल्याएको अवस्थामा पटेलको साथबाट प्रहरीले एक थान कटुवा पेस्तोल बरामद गरेको छ ।
पेस्तोल सहित पक्राउ परेका युवकलाई प्रहरी हिरासतमा राखी थप अनुसन्धान भईरहेको रौतहट प्रहरीले जनाएको छ ।
आगलागीबाट गाईगोठमा ३ लाखको क्षति
पर्साको बहुदरमाई नगरपालिकामा शनिबार राति भएको आगलागीमा ३ लाखको क्षति भएको छ ।बहुदरमाई ६ गम्हरिया टोलमा अमेरिकाप्रसाद यादवको गोठमा भएको आगलागीमा उक्त मुल्य बराबरको क्षति भएको हो ।
गोठमा लामखुटे धपाउन बालिएको घुरबाट शनिबार राति साढे एक बजे आगो लागेको स्थानीय बद्री तिवारीले जानकारी दिए । आगलागीमा परी गोठमा बाँधिएको एक वटा भैसी मर्नुका साथै गोठभित्र रहेको एक भकारी धान जल नष्ट हुँदा करिब ३ लाख बराबरको क्षति भएको हो ।
आगलागिलाई स्थानीयबासीहरु मिलेर नियन्त्रणमा लिएका थिए । आगो निभाउने क्रममा घरधनी यादव जलेर घाईते भएका छन् । नगरपालिकामा बारुण यन्त्र नहुँदा समयमै बारुण यन्त्र पुग्न सकेको थिएन । प्रहरी भने आईतबार बिहान मात्रै घटनास्थलमा पुगेको स्थानीयबासीको गुनासो छ ।
