वीरगंज। नेपालले चाँडै विश्वको सर्वोच्च शिखर सगरमाथाको नयाँ उचाई सार्वजनिक गर्ने भएको छ।
आज (बुधबार) बसेको मन्त्रीपरिषद्को बैठकले सगरमाथाको नयाँ उचाई घोषणा गर्न भूमी व्यवस्था, सहकारी तथा गरिबी निवारण मन्त्रालयलाई स्वीकृती प्रदान गरेको छ।
विभागीय मन्त्री पद्माकुमारी अर्यालले सगरमाथाको नयाँ उचाई घोषणा गर्न स्वीकृती दिन मन्त्रिपरिषद्मा प्रस्ताव पेश गरेकी थिइन्।
मन्त्रिपरिषद्को स्वीकृतीसँगै अबको केही दिनमा मन्त्रालयले एउटा कार्यक्रमको आयोजना गरि नयाँ उचाई सार्वजनिक गर्ने छ।
२०७२ सालको विनाशकारी भूकम्पपछि उचाई थपघट भएको आशंकाबीच नेपालले आफ्नै लागतमा उचाई मापन गरेको हो। यस्तै चीनले पनि आफ्नै तर्फबाट उचाई मापन गरेको थियो।
नेपाल र चीनले संयुक्त रुपमा कार्यक्रम गरि सगरमाथाको नयाँ उचाई घोषणा गर्ने सहमति छ। सोही पूर्व सहमति अनुसार नेपालले अहिलेसम्म सार्वजनिक नगरेको हो।
स्रोतका अनुसार विश्वको सर्वोच्च शिखर सगरमाथको उचाई बढेको पाइएको छ।
चीनका रक्षामन्त्री वेइ फङ्गह केही दिनमा नेपाल भ्रमणमा आउँदै छन्। सोही समयमा नयाँ उचाई घोषणा हुनसक्ने बताइएको छ।
