बीरगन्जस्थित नारायणी अस्पतालले उपलब्ध गराएको जानकारी अनुसार पर्सामा ६ र बारामा ४ जनागरी थप १० जनामा कोरोनाभाइरस संक्रमण पुष्टि भएको हो ।
अस्पतालको पिसिआर प्रयोशालामा बुधबार र बिहिबार जम्मा गरिएको ९६ जनाको थ्रोट स्वाबलाई परिक्षण गर्दा २ महिला र सहित २१ वर्षदेखि ३२ वर्ष उमेर समुहसम्मका १० जना कोभिड पोजेटिभ भएका छन् ।
पर्सामा कोभिड पोजेटिभ भएकामध्ये ५ जना बीरगन्ज महानगरपालिका र एक जना कालिकामाई गाउँपालिकाका बासिन्दा हुन् ।
नारायणी अस्पतालका प्रवक्ता एवम् वरिष्ठ चर्म रोग विशेषज्ञ डाक्टर अतुलेशकुमार चौरसियाले अनुसार बीरगन्ज महानगरपालिकाको वडा नम्बर १५ का दुई जना र वडा नम्बर १०, १३ र २५ का एक/एक जना संक्रमित भएका छन् । त्यसैगरी कालिकामाई गाउँपालिकाका पनि एक जना संक्रमित भएका छन् । उनको वडा खुल्न सकेको छैन ।
उता बारा जिल्ला जितपुरसिमरा उपमहानगरपालिकाको वडा नम्बर १ र २१ का एक/एक जना, कोल्भी नगरपालिका वडा नम्बर ११ र करैयामाई गाउँपालिका वडा नम्बर ८ का एक/एक जना रहेका छन् ।
थपिएका संक्रमितहरुको सिटि भ्यालु २१ देखि ३२ सम्म रहेको डाक्टर चौरसियाले जानकारी दिए । उनले सिटि भ्यालु २४ भन्दा माथि रहेका संक्रमितले अन्यमा कोरोना सार्ने सम्भावना कम रहेको बताए ।
