ब्रुनाईका राजकुमार हाजी अब्दुल अजिमको ३८ वर्षको उमेरमा मृत्यु भएको छ।लामो समयदेखि बिरामी रहेका अजिमको शनिबार असामयिक निधन भएको हो।सन् १९८२ जुलाई २९ मा राजधानी बन्दर सेरी बेगावानमा जन्मिएका अजिम ब्रुनाईका सुल्तान हाजी हसनल बोल्किआका दोस्रो पुत्र थिए।

सुल्तानको कार्यालयले विज्ञप्ति जारी गरेर राजकुमारको मृत्यु भएको जानकारी गराएको छ। विज्ञप्तिमा राजकुमारको निधनमा शोक मनाउन सात दिनसम्म आधा झण्डा झुकाइने उल्लेख छ। त्यस अवधिमा कुनै पनि औपचारिक कार्यक्रम हुने छैनन्।

उनको मृत्युको कारणबारे दरवारले कुनै जानकारी नदिए पनि उनी लामो समयदेखि बिरामी रहेका अन्तर्राष्ट्रिय सञ्चार माध्यमहरुले जनाएका छन्।