वीरगंज । अब बढाबढको आधारमा सेलुलर फ्रिक्वेन्सी प्राप्त गर्ने व्यक्तिले दूरसञ्चार सेवाको अनुमतिपत्र प्राप्त गर्न सक्ने भएको छ । दूरसञ्चार ऐनका लागि तयार पारिएको मस्यौदामा अब बोलकबोलकबाट फ्रिक्वेन्सी प्राप्त गर्नेलाई दूरसञ्चार सेवाको एकीकृत अनुमतिपत्र दिइने व्यवस्था गरिएको हो ।
यद्यपि ऐनको मस्यौदा भने प्रारम्भिक चरणमै रहेको सञ्चार तथा सूचना प्रविधि मन्त्रालयले जनाएको छ । मन्त्रालयका सचिव हरिप्रसाद बस्यालका अनुसार सम्बन्धित निकायको राय तथा परामर्श र छलफल पश्चात चाँडै मन्त्रिपरिषदमा पेश गरिनेछ ।
यसको अर्थ प्रस्तावित व्यवस्था अनुरुप नै ऐन बनेको खण्डमा दूरसञ्चार सेवाको फ्रिक्वेन्सीका लागि खुल्ला प्रतिस्पर्धा गरिनेछ । हालको व्यवस्थामा अनुमतिपत्र प्राप्त व्यक्ति तथा कम्पनीले मात्रै फ्रिक्वेन्सी पाउने अवस्था रहेको छ ।
फ्रिक्वेन्सी बढाबढबाट एकीकृत अनुमतिपत्र प्राप्त गर्नेलाई प्रविधि तटस्थताको नीति अनुरुप सेवा सञ्चालन गर्न पाउने छन् ।
यसरी अनुमतिपत्र प्राप्त गर्ने व्यक्तिले दुई वर्षभित्र तोकिएको सेवा विस्तार सम्बन्धी शर्तहरु पुरा गरी दूरसञ्चार सेवा सञ्चालन नगरेको खण्डमा उक्त अनुमतिपत्र स्वतः रद्द हुने व्यवस्था ऐनको मस्यौदामा गरिएको छ ।
प्राधिकरणले उपलब्धताभन्दा माग बढी भएको वा बजारमा प्रतिस्पर्धा हुन सक्ने फ्रिक्वेन्सीको वितरण बढाबढको माध्यमबाट वितरण गर्ने जनाइएको छ ।
यसैगरी ऐनमा दूरसञ्चार सेवाका लागि तीन किसिमको व्यवस्था गरिएको छ । जसमा दूरसञ्चार सेवाका लागि एकीकृत अनुमतिपत्र, नेटवर्क, इन्टरनेट तथा भ्यालुएडेड सेवाका लागि साधारण अनुमतिपत्र र पूर्वाधार सेवाको अनुमतिपत्रकाे व्यवस्था रहेकाे छ ।
