वीरगंज संजालकाठमाडौं । विगत सात महिनादेखि कोरोना संक्रमणका कारण चलचित्रसम्बन्धी सबै काम ठप्प भएको छ । यसैबीच नयाँ चलचित्र ‘हिँड्दाहिँड्दै’को निर्माण घोषणा गरिएको छ । निषेधाज्ञा खुकुलोसँगै चलचित्र क्षेत्रका गतिविधि पनि बढ्न थालेकोले आफूहरूले अब छायांकन सुरु गर्न लागेको यो चलचित्रका निर्देशक मिलन आले मगरले बताएका छन् ।
यो चलचित्रको सोमबार काठमाडौंमा एक समारोहबीच मुहूर्त गरिएको छ । सात महिनापछि सिनेमाको औपचारिक कार्यक्रम काठमाडौंमा सोमबार गरिएको हो । नारायण सुशील पंगेनी इन्टरटेन्मेन्टको ब्यानर र मिलन आले मगरको निर्देशनमा निर्माण हुने प्रेम कथानक चलचित्र ‘हिँड्दाहिँड्दै’ को शुभ मुहूर्त समारोेहमा भौतिक दुरी कायम राख्दै सम्पन्न गरियो ।
यसै साताबाट छायांकन सुरु गरिने चलचित्र हिँड्दाहिँड्दैमा आकाश श्रेष्ठ, सलोन बस्नेत, विकास थापासँगै नव अभिनेत्री रेखा शाहको मुख्य भूमिका छ । चलचित्र पत्रकार तथा निर्देशक लक्ष्मण सुवेदीको निर्देशनमा सम्पन्न मुर्हूत सर्टमा आकाश, रेखा र सलोनले अभिनय गरेका थिए ।
काठमाडौं उपत्यका र तराईमा खिचिने फिल्ममा देव महर्जनको द्वन्द्व निर्देशन, वसन्त सापकोटाको संगीत, कविराज गहतराजको नृत्य निर्देशन, अमृत महरठ्ठाको मेकअप, निरञ्जन घिमिरेको ड्रेस, मधुराज भण्डारीको हेयर ड्रेसिङ रहनेछ । सुमनकुमार तण्डुकारले खिच्ने यो चलचित्रमा दिल लामा, रामकुमार थिङ र पारस गुरुङ निर्माता छन् । सुशील पंगेनी प्रस्तुतकर्ता रहेको चलचित्रको स्क्रिप्ट पनि पंगेनीले नै लेखेका हुन् ।
कार्यक्रममा अभिनेता आकाशले चलचित्रमा आफू एक प्रेमीको भूमिकामा रहेको खुलासा गरे । त्यसैगरी, अर्का अभिनेता सलोनले चलचित्रमा आफू दर्शकलाई हसाउने तथा रुवाउने, दुवै प्रकारको चरित्रमा रहने भूमिकामा भएको बताए । नव अभिनेत्री रेखाले आफू मिहिनेत गरेर यो फिल्मबाट स्थापित हुने विश्वास व्यक्त गरिन् । निर्देशक आलेले यो चलचित्रमा युवा पुस्ताको प्रेम भावनालाई प्रस्तुत गरिने जानकारी दिए । फिल्म पारिवारिक कथामा एक्सन प्रधान जनरामा निर्माण हुने बताए ।
