जनकपुरधाम | प्रादेशिक अस्पताल जनकपुरमा रहेको थ्रोट स्वाब परिक्षण गर्ने मेसिनमाथि शंका लागेपछि थ्रोट स्वाब परिक्षण स्थगित गरिएको छ ।

बिहीबार सर्लाहीका एक १४ वर्षीय बालकमा कोरोना पोजिटिभ रहेको नतिजा सार्वजनिक भए लगत्तै प्रादेशिक अस्पतालको पीसिआर चेकजाँच गर्ने मेसिनले गलत रिपोर्ट दिएको भन्दै चेकजाँच कार्य बन्द गरिएको हो ।

नकपुरमा स्वाब परीक्षण गर्दा कोरोना भाइरसको नतिजा नेगेटिभ आएका सर्लाहीका किशोरको रिपोर्ट बिहीबार काठमाडौंस्थित राष्ट्रिय जनस्वास्थ्य प्रयोगशाला टेकुले पोजेटिभ देखाएपछि जनकपुरको पीसीआर मेसिनको गुणस्तरीयता माथि शंका गर्दै चेकजाँच बन्द गरिएको छ ।

किशोरको गत चैत ६ गते सर्लाही जिल्लाको हरकठवा क्वारेन्टाइन र जनकपुरधामको प्रादेशिक अस्पतालमा गरिएको र्यापिड टेस्टमा पोजेटिव देखिएको थियो । तर ७ गते प्रादेशिक अस्पतालमा रहेको पीसीआर मेसिनमा नेगेटिभ आएपछि उनलाई अस्पतालबाट डिस्चार्ज गरिएको थियो ।
प्रादेशिक अस्पताल जनकपुरमा अहिलेसम्म जाँच गरेका एक सयभन्दा बढी स्वाब परिक्षणको रिपोर्ट नेगेटिभ आएको छ । बिहीबार फरक नतिजा आएपछि ति सबै नमुना शंकाको घेरामा परेका छन् ।

प्रादेशिक प्रयोगशालाका निमित्त निर्देशक डाक्टर रामविनय साहले फरक नतिजा आउनुमा पीसीआर मेसिनको नतिजा नै प्रमुख कारण रहेको बताए । कम गुणस्तरको मेसिन जडान भएकाले भरपर्दो नतिजा आउन नसकेको साहले बताए । साहले भने,‘हामीले एक सयभन्दा बढी स्वाब परीक्षण गरिसकेका छौं । पीसिआर मेसिन भरपर्दो छैन् त्यसैले सही परिणाम नदिने मेसिनमा परीक्षण गर्नुको कुनै अर्थ पनि रहेन् ।’

सो किशोरको घटनामा प्रादेशिक अस्पतालमा दुई पटक स्वाब परीक्षण गरेकोमा दुबैपटक नेगेटिभ देखाए पनि काडमाडांैमा पोजिटिभ भयो त्यसैले अब मेसिन नै खराब रहेको सहजै अनुमान गर्न सकिन्छ । निमित्त निर्देशक साहले यसअघि १५ स्थानमा जडान गरिएको यस्तै मेसिन हटाइएर बढी क्षमता भएको पीसीआर जडान भइसके पनि प्रादेशिक अस्पतालमा नभएको जनाए ।

नयाँ मेसिन जडान गर्न सम्बन्धित निकायलाई जानकारी गराइसकेको समेत साहले जानकारी दिए । उनले विहिवार ८ वटा स्वाब परीक्षण गरिएपनि शुक्रवारबाट परीक्षण नगरिने बताए ।