जनकपुरधाम | विश्वभरी कोरोना भाइरसको संक्रमण फैलिने खतरा कायम रहेको समयमा नेपाल सरकारले लकडाउनलाई निरन्तरता दिएको छ ।

कोरोना संक्रमण फैलिन नदिन पूरै देश अहिले पनि लकडाउनमा छ । यद्यपि प्रदेश २ को अस्थायी राजधानी जनकपुरधाममा नै लकडाउनको उल्लंघन भएको छ । जिल्ला विपद व्यवस्थापन समिति धनुषाले खाद्यान्न, इन्धन, औषधि, तरकारी, दुध, खानेपानी लगायतका अत्यावश्यक उपभोग्य वस्तुहरु बिहान ५ बजेदेखि बेलुकी ४ बजेसम्म खरिद बिक्री गर्ने निर्णय गरेपछि प्रदेश २ को अस्थायी राजधानी जनकपुरमा लकडाउन उल्लंघन भएको हो ।

मंगलबार बसेको विपद व्यवस्थापन समितिको बैठकले अत्यावश्क दैनिक उपभोग्य वस्तु बिहान ५ बजेदेखि अपराह्न ४ बजेसम्म खरिदबिक्री गर्न सकिने निर्णय गरेको थियो । जनकपुरधाममा विपद व्यवस्थापनको निर्णयपछि बुधबारदेखि बजारमा चहलपहल बढेको हो ।

बजारमा बिना काम घुम्नेको संख्या समेत बढेको छ । उनीहरु बिना कुनै सावधानी घुमिरहेका देखिन्छन् भने सवारी साधनहरु पनि निर्वाध रुपमा गुड्न थालेका छन् । कोरोना संक्रमणको खतरा बढिरहेको बेला लकडाउनलाई थप कडाइ गर्नुपर्नेमा यस्तो निर्णय गरेर जोखिम बढाउने काम भएको युवा अभियन्ता सुशील कर्णले बताए ।

उनले भने,‘कोरोना संक्रमण रोकथाम गर्नु प्राथमिकता हुनुपर्नेमा विपद् व्यवस्थापन समितिको निर्णयले लकडाउनको धज्जी उडाएको देखिन्छ । विपद व्यवस्थापन समितिको निर्णयपछि कामै नभए पनि सामान खरिद गर्ने बहानामा मानिसहरु सडकमा हिंड्न थालेका छन् ।’‘यहाँ मेरो घर छ, हामीले जति आग्रह गरेपनि कसैले कुनै चासो लिदैंन । बजारमै घर रहेकाले हामीलाई कोरोनाको त्रासपूर्ण स्थितिमा बस्नुपरेको बाध्यता छ,उनले भने,‘यस्तो अवस्थामा प्रशासनले किन लुज प्रदर्शन देखाउँछ, थाहै भएन ।

यता विपद व्यवस्थापन समितिका अध्यक्ष समेत रहेका धनुषाका प्रमुख जिल्ला अधिकारी कोशहरि निरौलाले सडकमा हिँड्नेलाई कारबाही गर्ने चेतावनी दिएका छन् । उनले भने,‘समितिले अत्यावश्यक उपभोग्य वस्तुहरु मात्र खरिद बिक्री गर्न सकिने निर्णय गरेको छ । खाद्यान्न लगायतका अत्यावश्यक वस्तु बाहेक अन्य पसल संचालन गर्ने निर्णय भएको छैन् ।’

जनकपुरधाम उपमहानगरपालिका वडा नं.१० र ११ को सीमा जानकी मन्दिर देखि देविचौक जाने बाटोमा खुल्ला रुपमै हाट बजार लागेको र तरकारी किन्ने नाममा हुलका हुल मानिस त्यहाँ पुगेको देखिएको छ । सरकारले लकडाउन गर्नुको पछाडी कोरोना संक्रमण बढ्न नदिन सामाजिक दुरी कायम गराउनु हो । यद्यपि कैयौं स्थानमा लकडाउनको उल्लंघन त जसोतसो त्यसमाथी सामाजिक दुरीकोसमेत धज्जी उडाइएको पाइएको हो ।