जनकपुरधाम । खुला रक्सीका कारण व्यक्तिको ज्यान गइरहेको समाचार बाहिर आइरहँदा धनुषा प्रहरीले रक्सीका कारण आठ जनाको मात्रै मृत्यु भएको जनाएको छ । अन्य व्यक्तिको अन्य कारणले मृत्यु भएको प्रहरीको भनाई छ ।
जिल्ला प्रहरी कार्यालय धनुषाका अनुसार क्षिरेश्वरनाथ नगरपालिका २ रमदैया बस्ने ३५ बर्षीय ब्रहम देव यादव, ४० बर्षीय रामबिलास मण्डल, ३० बर्षीय राजु महरा, ६५ बर्षीय गुदरी महरा, ६५ बर्षीय श्रीदेव यादव, सोही नगरपालिकाको वडा नम्बर १ बस्ने ३६ बर्षीय रामनारायण महरा, २७ बर्षीय इन्द्रजीत महरा, ४७ बर्षीय शत्रुद्यन मण्डलको रक्सी सेवनका कारण मृत्यु भएको छ ।
यी सबैको फागुन २९ गतेदेखि चैत १ गतेसम्म मृत्यु भएको धनुषा प्रहरीका प्रबक्ता एवं डिएसपी रामेश्वर कार्कीले जानकारी दिए । उनका अनुसार ६ जना सिकिस्त भई उपचार गराइरहेका छन् ।
उनले क्षिरेश्वरनाथ नगरपालिका १ रमदैयाका ३७ बर्षीय रामईश्वर महरा, वडा नम्बर २ रमदैया बस्ने २३ बर्षीय प्रदिप सदा, ५० बर्षीय भरत मण्डल, ४४ बर्षीय मनिर नदाफ, २२ बर्षीय भरत सदा र ५० बर्षीय सिताराम यादवको उपचार भइरहेको जानकारी दिए ।
