झापा । झापाको दमकमा शनिबार राति भएको दुर्घटनामा दुईजनाको मृत्यु भएको छ । पूर्वपश्चिम राजमार्गअन्तर्गत दमक–५ स्थित क्याम्पसमोडमा भारतीय ट्रकले अटोलाई ठक्कर दिँदा अटोमा सवार दुई जनाको मृत्यु भएको हो ।
मृत्यु हुनेमा अटो चालक दमक–९ का ३९ वर्षीय हरि भुजेल र सोही ठाउँका २४ वर्षीय सुरज साह रहेको इलाका प्रहरी कार्यालय दमकका प्रमुख डीएसपी विजयराज पण्डितले जानकारी दिए । उनीहरूको घटनास्थलमै मृत्यु भएको प्रहरीले जनाएको छ ।
पूर्वबाट पश्चिमतिर आउँदै गरेको भारतीय नम्बर प्लेटको बिआर ०१ जिएस ७८ ट्रकले विपरीत दिशातर्फ जाँदै गरेको अटोलाई ठक्कर दिँदा दुर्घटना भएको थियो ।
दुर्घटनामा अन्य तीन घाइते भएको र उनीहरू स्थानीय अस्पतालमा सामान्य उपचारपछि घर फर्किएको प्रहरीले जनाएको छ ।ठक्कर दिने ट्रक र त्यसका चालकलाई प्रहरीले नियन्त्रणमा लिएको छ । News 24
