सिमकोट– हुम्लामा भएको टिपर दुर्घटनामा मृत्यु हुनेको संख्या चार पुगेको छ। नेपाल खाद्य संस्थानको अनुदानको खाद्यान्न ढुवानी गरिरहेको टिपर दुर्घटना भएकाे हाे।

दुर्घटनामा नाम्खा गाउँपालिका वडा नम्बर–१ हेक्पाकी नरी लामा, छिरिङकर्मा लामा र अन्य दुई जनाको मृत्यु भएको हाे। दुई जनाकाे सनाखत हुन सकेको छैन। लु ४ ख नम्बरको टिपर दिउँसो साढे तीन बजे दुर्घटना भएको हो।

केरुङबाट तिब्बती मार्ग हुँदै हिल्साबाट सल्लीसम्म गाडीमा ढुवानी भएको खाद्यान्न सल्लीबाट सिमकोट ढुवानी गर्ने क्रममा सिमकोट गाउँपालिकाको वडा नम्बर ७ को लाग्ना खोलामा टिपर दुर्घटना भएको हो।

उद्धारका लागि नेपाली सेना, प्रहरी र ठुलो संख्यामा सर्वसाधारण घटनास्थल पुगेका थिए। घाइते सबै जनाको अहिले जिल्ला अस्पतालमा उपचार भइरहेको र अवस्था गम्भीर रहेको जिल्ला अस्पतालकी सिनियर अनमी सरिता बोहराले बताइन्।चालक तामाङलाई प्रहरीले नियन्त्रणमा लिएको छ।