काठमाडौं | नेपाली कांग्रेसको भ्रातृ संगठन नेपाल विद्यार्थी संघ (नेविसंघ) ले बुधबार पनि भारतीय हस्तक्षेपका विरुद्ध प्रदर्शन गरेको छ। नेविसंघ ग्रामीण आदर्श बहुमुखी क्याम्पस र एन आर बहुमुखी क्याम्पसको आयोजनामा नेपाल टार, बाइपास, माछापोखरीक्षेत्रमा भारतीय हस्तक्षेप विरुद्ध प्रदर्शन गरेको हो।नेविसंघ निवर्तमान केन्द्रिय सदस्य सुशिल भट्टको नेतृत्वमा भएको विरोध प्रदर्शनमा विद्यार्थी र स्थानीयबासीको उपस्थिति थियो। नेपालटार ग्रामिण र एन आर कलेजबाट सुरु भएको विरोध र्याली बालाजु परिक्रमा गरी क्याम्पसमै पुगेर समापन भएको थियो।
भारतले नेपाली भूमि कालापानी, लिपुलेकलाई समेटेर नयाँ राजनीतिक नक्सा सार्वजनिक गरेको विरोधमा नेविसंघ काठमाडौंका विभिन्न स्थानमा दिनदिनै प्रदर्शन गर्दै आएको छ। नेपाली झण्डा हातमा बोकेका विद्यार्थीले नेपालको सीमा क्षेत्र नमिच्न भारतलाई चेतावनीसमेत दिएका छन्।
