उदयपुर– धारिलो हतियार प्रहार गरी उदयपुरमा गएराति एकै परिवारका दुई जनाको हत्या भएको छ । उदयपुरको त्रियुगा नगरपालिका वडा नम्बर ९ चौकिवारीमा आमा र छोरीको हत्या भएको हो । त्रियुगा नगरपालिका–९ चौकीबारी बस्ने ३० वर्षीया आमा शारदा कुमारी चौधरी (गोमा) र उनकी ९ बर्षीया छोरी रचना चौधरीको धारिलो हतियार प्रहार गरी हत्या भएको जिल्ला प्रहरी कार्यालय उदयपुरले जनाएको छ ।

प्रहरीका अनुसार मृतक दुवैको विभत्स अवस्थामा शव फेला परेको हो । हत्या किन र कसले गरेको भन्ने अहिलेसम्म केही खुल्न सकेको छैन् । हत्यामा संलग्नको खोजी जारी रहेको जिल्ला प्रहरी कार्यालय उदयपुरका एसपी बिरबहादुर बुढामगरले बताए । एसपी मगरका अनुसार हत्यारा पत्ता लगाउन धरानबाट तालिम प्राप्त कुकुर समेत ल्याइएको बताए । २४ घण्टा नबित्दै हत्यारा पत्ता लगाउन आफुहरू लागि परेको उनले जानकारी दिए ।