एजेन्सी । केबल २४ वर्षको उमेरमै १९६ देशको भ्रमण गरिसकेका व्यक्ति अहिले उनी समानका धेरै युवाहरुका लागि प्रेरणाका पात्र बनेका छन् । अघिल्लो वर्ष मात्र गिनिज बुकले उनलाई आधिकारिक रुपमा सबैभन्दा धेरै देश भ्रमण गर्ने विश्वकै कान्छो व्यक्तिको नाम दिएको हो । हाल २८ वर्षका जेम्स एसक्विथ लन्डनस्थित बैंकमा काम गरिरहेका छन् । उनले आफ्नो पहिलो यात्रा जम्मा १८ वर्षको उमेरमा सुरु गरेका हुन् ।

यसरी सानैदेखि विभिन्न काम गरि भ्रमणका लागि पैसा जोगाउने गरेको उनी बताउँछन् । १२ वर्षको उमेरमा नै उनी छिमेकमा कारहरु सफा गर्ने काम गर्दथे भने सम्पूर्ण भ्रमणको खर्चका लागि पनि उनले कडा संघर्ष गरेको बताए । उनी भन्छन्, “सबैलाई लाग्थ्यो कि मेरा आमाबुवा धनी भएकाले नै मैले यति ठूलो सफलता हासिल गर्न सकेको हुँ । तर वास्तवमा मेले आफ्नो रहर पूरा गर्न धेरै कठिनाइको सामना गरेको छु ।”

केही भ्रमणका क्रममा आफूले विभिन्न होटल र बारहरुमा समेत काम गरि खानेबस्ने निःशुल्क बन्दोबस्त मिलाएको उनी बताउँछन् । उनका अनुसार आफूले जसरी यात्रामा जाँदा खानबस्नमै धेरै खर्च लाग्ने गर्दछ । पाँच वर्ष भित्रमै १९६ देशको भ्रमण गर्न सफल जेम्स भन्छन्, “केबल रेकर्डकै लागि यत्तिका देशहरुको भ्रमण गर्छु भनेर मैले कहिल्यै सोचिन तर केही समय यता मलाई धेरैले ‘तिम्रो रेकर्ड तोड्छु’ भनिरहेका छन् ।”

यसरी उनलाई आफ्ना पितासँग घुम्न सुरु गरेदेखि नै भ्रमणप्रति रुची जागेको बताए । उनले भने, “त्यसबेला मैले सोचेँ, मलाई अझै धेरै कुरा हेर्नुछ ।”

यस्तोमा १८ वर्षको हुँदा युनिभर्सिटीको पढाइ सुरु गर्नु अगाडि उनी एक वर्षको ग्याप लिएर आफूले बचाएको रकम लिइ पहिलोपटक साथीहरुसँग दक्षिण एसिया घुम्न गएका थिए ।

तर तीन महिने भ्रमणका रुपमा सुरु भएको उनको यात्रा पाँच वर्षसम्म जारी रहेको हो । जसक्रममा उनी युद्धग्रस्त अफगानिस्तान समेत पुगेर जिपमा सोमालिया घुमेका हुन् ।

यसरी तीन महिना अगाडि मात्र इन्स्टाग्राम अकाउन्ट खोलेका उनको अहिले ६ लाख भन्दा बढी फलोअर छन् । लन्डनमा अर्थशास्त्र लिएर पढ्दै गर्दा पनि उनले विभिन्न स्थल भ्रमण गर्ने समय मिलाएको बताउँछन् ।  तर भ्रमणप्रति उनको रुचीलाई पूरा गर्नु आर्थिक हिसाबले धेरै चुनौतिमय रहेको हुँदा कुनै समय आफूले एकैपटक तीन ठाउँ काम गर्नु परेको उनी बताउँछन् ।

यस्तोमा उनले शेयर बजारमा समेत हात हालेको र त्यसमा भाग्यले साथ दिएकै कारण यति ठूलो उपलब्धि हासिल गरेको बताएका हुन् । कमाएको सबै पैसा उनले भ्रमणमै खर्च गर्ने गरेको बताए ।  साथै एयरलाइन इमेलमा साइन अप गर्नुले पनि उनलाई धेरैपटक सस्तोमा उडान भर्ने अवसर दिलाएको बताएका छन् ।

बिजनेस इन्साइडरसँग कुरा गर्दै उनले जोर्डान र सिरिया लगायत मध्य पूर्वको भ्रमणलाई सबैभन्दा यादगार बताएका हुन् । त्यस्तै अफ्रिकामा चाहिँ उनले धेरै समय एक्लोपन महसुस गरेको बताए । आफूले प्रत्येक देशमा कम्तीमा पनि एक रात बिताउने प्रयास गरेको उनको भनाइ छ । तर अझैपनि आफूले धेरै सिक्न र देख्न बाँकी भएकाले यात्रा अहिले नै अन्त्य नभएको उनी बताउँछन् ।

सीएनएनसँग कुरा गर्दै उनले आफू जस्तैगरी यात्रामा जान चाहने युवाहरुका लागि भने यस्तो सुझाव दिएका हुन्, “जस्तो सुकै यात्राका लागि पनि सधैँ तयार हुनुपर्छ र कुनै कुरासँग पनि डराउनु हुँदैन । पछिल्लो समय शिर्ष समाचारमहरुमा नकारात्मक खबर बढी आइरहेका छन् तर बहादुरीता नै जस्तोसुकै लक्ष्य पूरा गर्ने एकमात्र हतियार हो ।”

यसरी कुनैपनि नयाँ कुरा सिक्न यात्रा र भ्रमण भन्दा राम्रो तरिका नहुने बताउँदै उनले युनिभर्सिटीमै पढेका भरमा सबैकुरा जानेको छु भन्नेमा विश्वास नराख्न भनेका हुन् ।  उनले भने, “मेरो अनुभवमा नयाँ ठाउँ घुमेर त्यहाँका मानिस, समाज र संस्कृति अनि परम्पराबारे जानेर नै संसारको वास्तविकता बुझ्न सकिनेछ । यसले नै मेरो किशोरावस्था अरुको जस्तो तनावयुक्त र आक्रामक नभएर उत्साहजनक बन्न पुगेको हो ।”

फेरि यस्तो भ्रमणमा गए के गर्नु हुन्थ्यो भन्ने प्रश्नमा चाहिँ उनले आफूले सबै ठाउँमा धेरै दिन बिताउन चाहेको बताएका हुन् ।