वीरगंज । देशको समग्र आयात, निर्यात घटेपछि वीरगन्जका दुवै भन्सार कार्यालयले यस आर्थिक वर्षमा लक्ष्य अनुरुप राजस्व उठाउन असमर्थ हुने भएका छन् । वीरगन्ज र सिर्सिया सुक्खा बन्दरगाह भन्सारले यस वर्ष पाएको वार्षिक राजस्व असुलीको ६० प्रतिशत भेटाउन पनि मुस्किल पर्ने संकेत देखिएको छ । वीरगन्ज भन्सार कार्यालयले जेठ महिनामा २३ अर्ब ४२ करोड रुपैयाँ राजस्व असुलीको लक्ष्य पाएकोमा लक्ष्यको ५९.३८ प्रतिशत अर्थात् १३ अर्ब ९० करोड रुपैयाँ मात्र असुली गरेको छ । सो भन्सारले चालु आवको जेठ महिनासम्ममा २ खर्ब ३७ अर्ब ५८ करोड रुपैयाँ राजस्व असुलीको लक्ष्य पाएकोमा ५४.५१ प्रतिशत अर्थात् १ खर्ब ४२ अर्ब २५ करोड रुपैयाँ मात्र संकलन गरेको छ ।

देशभरकै भन्सार कार्यालयमध्ये सर्वाधिक राजश्व संकलन गर्दै आएको यो भन्सारले चालु आवका लागि २ खर्ब ६१ अर्ब रुपैयाँ असुलीको लक्ष्य पाएको छ । यता सिर्सिया सुक्खा बन्दरगाह भन्सार कार्यालयले जेठ महिनामा ६ अर्ब २३ करोड ८५ लाख ६६ हजार रुपैयाँ राजस्व असुली गर्ने लक्ष्य राखेकोमा ६४.८० प्रतिशत अर्थात् ४ अर्ब ३० करोड २२ लाख ४ हजार रुपैयाँ मात्र संकलन गरेको छ । चालु आवको जेठ महिनासम्ममा ६१ अर्ब ५२ करोड ९५ लाख रुपैयाँ राजस्व असुलीको लक्ष्य पाएकोमा ५८.५८ प्रतिशत अर्थात् ३९ अर्ब ४५ करोड ९४ लाख रुपैयाँ संकलन गर्न सकेको छ । चालु आर्थिक वर्षमा यो भन्सारले ६७ अर्ब ४३ करोड ८६ लाख रुपैयाँ राजस्व संकलन गर्ने लक्ष्य पाएको छ । वीरगन्ज भन्सारको राजस्वमा सर्वाधिक योगदान गर्ने वस्तु नया सवारीसाधन र इन्धन हुन् ।

कार्यालयका सूचना अधिकृत रामचन्द्र ढकालले चालु आवमा नयाँ सवारी साधन र इन्धनको आयात घटेकाले राजस्वमा असर परेको बताए । ‘राजस्वमा सर्वाधिक योगदान गर्ने नयाँ सवारीसाधन, डिजेल र पेट्रोलसँगै खाना पकाउने एलपी ग्यासको आयात पनि घटेको छ’ उनले भने ‘वार्षिक राजस्व असुली अब असार महिनाभित्र भेटाउन असम्भव छ ।’यता सिर्सिया सुक्खा बन्दरगाह भन्सार कार्यालयका सूचना अधिकृत सन्तोष न्यौपानेले यो नाकाबाट राजस्वमा योगदान गर्ने प्रमुख वस्तु मदिरा तथा डण्डी उद्योगको कच्चा पदार्थको आयात पनि घटेकाले राजस्वमा असर परेको बताए ।