वीरगंज । नयाँ शैक्षिक सत्रमा वीरगंजका निजी तथा आवासीय र सामुदायिक विद्यालयहरूमा नर्सरी देखि १० कक्षा सम्म ८४ हजार ५ सय १२ विद्यार्थी भर्ना भएका छन् । वीरगंज महानगरपालिकाको ३२ वडामा रहेका ९० सामुदायिक विद्यालय तथा १ सय २५ निजी विद्यालयमा गरि ८४ हजार ५ सय १२ विद्यार्थी भर्ना भएको वीरगंज महानगरपालिकाका शैक्षिक महाशाखा प्रमुख अरविन्दलाल कर्णले जानकारी दिनुभयो । वीरगंजमा सामुदायिक विद्यालय तर्फ २१ वडा माध्यमिक विद्यालय, १५ वटा निम्न माध्यमिक र ५४ वटा प्राथमिक विद्यालयहरू रहेका छन् । ती विद्यालयमा ७ सय ७८ जना शिक्षक, शिक्षिका र बालविकासका १ सय ६८ जना शिक्षिकाहरूले पठन पाठन गराउँदै आएका छन् । महानगरको मात्रै झण्डै वार्षिक रुपमा १ अर्ब रुपैयाँ शिक्षकको तलब, भत्ता र विद्यालयको सुधार कार्यक्रममा खर्च हुने गरेको छ ।

महानगरपालिकाले वार्षिक रुपमा सङ्घीय सरकारबाट प्राप्त ९६ करोड र निजी श्रोतबाट ४ करोड गरी १ अर्ब रुपैयाँ महानगरको शैक्षिक क्षेत्रको विकासका लागि खर्च गर्दै आएको कर्णले बताउनुभयो । हाल वीरगंजका सामुदायिक विद्यालयहरूमा ४५ हजार ६ सय ९० जना विद्यार्थी अध्ययनरत रहेका छन् । त्यसैगरी महानगरपालिकामा आबद्ध १ सय २५ वटा निजी विद्यालयहरूले ४० हजार विद्यार्थीलाई पठन पाठन गराउँदै आएको कर्णले जानकारी दिनुभयो ।
स्थानीय तहको नियन्त्रणमा आएपछि नगर क्षेत्रका सामुदायिक विद्यालयहरू विगतमा भन्दा सुधार हुँदै गएको र अहिले अधिकांश विद्यालयमा विद्यार्थीलाई राख्ने ठाउँ नभएको, भौतिक पूर्वाधारको कमी, विषयगत शिक्षकको कमी, विद्यार्थीलाई पोशाकको समस्या, विद्यार्थी सङ्ख्या बढेपनि बजेट नबढ्दा समस्या बढ्दै गएको, कर्णले गुनासो गर्नु भयो । त्यसैगरी निजी विद्यालय तर्फ अनुमति नलिई सञ्चालन गर्ने महानगरपालिकामा विद्यालय दर्ता गर्न नआउने, शुल्कको वर्गीकरण र ग्रेडिङमा नआउने, शिक्षकहरूको तलब, भत्ता, सुविधा नदिने लगायतका समस्या देखिएको छ ।

वीरगंज महानगरपालिकाले शैक्षिक सुधारका लागि देशमै पहिलो पटक निजी विद्यालयहरूको अनुगमन पछि वर्गीकरण गरी शुल्क निर्धारण गरेको छ । यसले निजी विद्यालयलाई गुणस्तरीय शिक्षा र समयसापेक्ष शुल्क लिन बाध्य बनाएको छ । त्यसैगरी महानगरपालिकाले अग्रेजी माध्यमबाट ४ वटा माध्यमिक विद्यालयमा निःशुल्क पठन पाठन शुरु गरेपछि अहिले ती विद्यालयमा विद्यार्थी भर्नाको चाप थेगिनसक्नु भएको छ । वीरगंज महानगरपालिकाले निःशुल्क रुपमा गुणस्तरीय शिक्षा विपन्न वर्गको पहुँचमा पुर्‍याउन अंग्रेजी माध्यमबाट निःशुल्क पठन पाठन शुरु गरेको बीरगंज महानगरपालिकाका नगर प्रमुख राजेशमान सिंहले बताउनुभयो ।