वीरगञ्ज । जनमत पार्टीका अध्यक्ष डा. सिके राउतले बारा निर्वाचन क्षेत्र नम्बर २ मा सम्पन्न उपनिर्वाचन शान्तिपूर्ण ढंगबाट सम्पन्न भएको गृहमन्त्रीको दावीप्रति आपत्ति जनाएका छन् । बुधबार प्रतिनिधिसभाको बैठकमा उपप्रधानमन्त्री तथा गृहमन्त्री नारायणकाजी श्रेष्ठले आइतबार सम्पन्न बारा-२ सहित देशका अन्य दुई क्षेत्रमा भएको उपनिर्वाचन शान्तिपूर्ण तरिकाले सम्पन्न भएको बताएपछि जनमतका अध्यक्ष डा. राउतले आपत्ति जनाएका हुन् ।
प्रतिनिधिसभाको बैठकमा सून्य समयमा बोल्दै डा. राउतले पाँच दलीय गठबन्धनको सरकारले सत्ताको लाठी र बन्दूकको बलमा गराएको निर्वाचनलाई शान्तिपूर्ण भन्न नमिल्ने बताए । उनले मतदानका क्रममा व्यापक आचारसंहिताको उलंघन भएपनि कुनै कारवाही नभएको आरोप लगाउँदै आफूसमेतलाई प्रहरीले पक्राउ गरेको बताए ।
‘गृहमन्त्रीज्यूले भर्खरै उपनिर्वाचन शान्तिपूर्ण ढंगले सम्पन्न भएको बताउनुभयो । तर म सोध्न चाहन्छु, सत्ताको लाठी र बन्दूकको बलमा सत्ता गठबन्धन इत्तरका कार्यकर्ताहरुलाई घरबाट बाहिरपनि निस्किन दिइँदैन । प्रचारप्रसार गर्न दिइँदैन । जहाँ नक्कली मतपत्र छ्यापछ्याप्ती बुथ बाहिर भेटिएका छन् । नक्कली मतपत्र खसाल्ने क्रममा त्यहाँ मान्छे पक्राउ पनि परेको छ । पैसा बाड्ने क्रममा मान्छे पक्राउ परेको छ । त्यो ठाउँमा कस्तो खालको शान्तिपूर्ण निर्वाचन?’ डा. राउतले प्रश्न गरे ।
राउतले निर्वाचन अनुगमनमा जाने क्रममा आफूलाईसमेत प्रहरीले पक्राउ गरेको आरोप लगाउँदो भने, ‘म आफैपनि कब्जा भएका बुथहरुमा निर्वाचन आयोगको लिखित अनुमति लिएर जाँदा प्रहरीले मलाई समेत पक्राउ गरेको छ । यस्तो अवस्थामा उहाँले कस्तो शान्तिपूर्ण निर्वाचन गराउनु भएको छ ? म प्रश्न गर्न चहान्छु ।’
आइतबार सम्पन्न बारा-२ को उपनिर्वाचनको बुधबार बिहान अनितिम मतपरिणाम आउँदा जनता समाजवादी पार्टी नेपाल (जसपा) का अध्यक्ष उपेन्द्र यादव विजयी भएका छन् । उनले जनमतकै उम्मेदवार शिवचन्द्र कुशवाहलाई पाँच हजारभन्दा बढी मतले पराजित गर्दै जितेका हुन् ।