खोटाङ | खोटाङको रावाबेंशी गाउँपालिकाको नाममा रहेको १ गाडीमा अज्ञात समुहले आगजनी गरेको छ। पार्किङ गरेर राखिएको बा २ झ ३५२४ नम्बरको महिन्द्रा स्कारपियोमा आगजनी भएको हो। आगजनीबाट गाडीमा पूर्णरुपमा क्षति पुगेको छ।
रावाबेंशी गाउँपालिका–५ दुबेकोलमा गाउँपालिका अध्यक्ष लिलानाथ निरौलाको घरमा पार्किङ गरेर राखिएको गाडीमा सोमबार राती अन्दाजी १२:५८ मा आगजनी भएको गाउँपालिका अध्यक्ष निरौलाले बताए। रातको समयमा ठूलो आवाज पड्केको सुनेपछि हेर्दा गाडीमा आगजनी भइरहेको उनले बताए।
गाडीमा आगजनी भएको खबर प्रहरीलाई गरेपछि कुभिण्डेको हरमटार र ऐंसेलुखर्कबाट आएका प्रहरीले राती साढे १ बजे आगो नियन्त्रणमा लिएका थिए। जिल्ला प्रहरी कार्यालय खोटाङका प्रहरी नायव उपरीक्षक बामदेव गौतम राती नै घटनास्थल पुगेर अनुसन्धान सुरु गरेको बताए। ३८ लाखमा खरीद गरिएको गाडी गाउँपालिका अध्यक्षले प्रयोग गर्दै आएका थिए।
मंसिर १५ गते दोर्पाको लप्सेखोला, पंखुखोला र चखेवाभन्ज्याङमा गोल्डेन गुड शेर्पा कन्ट्रक्सनको चार स्काभेटर अज्ञात समुहले जलाइदिएका थिए।
