बारा । आगामी बैशाख १० गते हुने निर्वाचनको मिति नजिंिकदो छ । उम्मेदवारहरु घरदैलोमा व्यस्त छन् । बारा निर्वाचन क्षेत्र नम्बर २ मा चार ‘हेवि वेट’सहित ३६ उम्मेदवार प्रतिस्पर्धामा छन् । जनता समाजवादी पार्टी (जसपा)का अध्यक्ष उपेन्द्र यादव, जनमत पार्टीका शिवचन्द्र कुशवाहा, नेकपा एमालेका पुरुषोत्तम पौडेल र राष्ट्रिय स्वतन्त्र पार्टी (रास्वपा)का रमेश खरेल मुख्य प्रतिस्पर्धीको रुपमा देखिएका छन् । तर सबै उम्मेदवारले नतिजा आफनो पक्षमा ल्याउने गृहकार्य गरिरहेको छ । चर्चामा रहेका यी चारमध्ये जसपा अध्यक्ष यादव र रास्वपाका खरेल पर्यटक उम्मेदवार मात्रै छैनन्, गत मंसिरमा सम्पन्न निर्वाचनमा पराजित उम्मेदवार पनि छन् । कुशवाहा पनि यसअघि एमाले– जसपा गठबन्धनको साझा उम्मेदवार रामसहाय प्रसाद यादवसँग तीन सय ५४ मतले पराजित उम्मेदवार छन् ।

कुशवाहा पाँच दलीय गठबन्धनबाट उम्मेदवार थिए । तर यसपटक उनी सत्ता गठबन्धनबाट टिकट नपाउने सुइको पाएपछि जनमत प्रवेश गरी उम्मेदवार बनेका छन् । उनले पर्यटक उम्मेदवारविरुद्ध आफ्नो उम्मेदवारी रहेको बताउँदै आएका छन् । ‘स्थानीयको समस्या स्थानीयले बुझेका हुन्छन् । म स्थानीय हुँ, मलाई जनताले भोट दिन्छन,’उनले भने,‘ यहाँका समस्या मैले बुझेको छँु, समाधान पनि म गर्छु ।’ यसअघि जसपालाई सघाएको नेकपा एमालेले उम्मेदवारी दिँदा पनि समीकरणमा बदलाब आएको छ । एमाले पोलिट ब्यूरो सदस्यसमेत रहेका पुरुषोत्तम पौडेल बाराका पुराना नेता छन् । युवा तथा खेलकुदमन्त्री पनि भइसकेका पौडेलको उम्मेदवारीले दुबै पर्यटक उमेदवारलाई कठिनाइ हुने जानकारहरुको अनुमान छ । उनले पनि जनताको घरदैलोमा पर्यटक उम्मेदवार र पराजित उम्मेदवारलाई पुनः हराउनु पर्ने बताउँछन् । उनले पनि आफू स्थानीय भएकाले जनताले विजयी गराउने बताए । बाहिरबाट आएका उम्मेदवारलाई भन्दा आफूलाई जनताले मन पराएकाले निर्वाचित हुनेमा ढुक्क रहेको उनको भनाइ छ ।

यस अघि सप्तरी निर्वाचन क्षेत्र नम्बर २ मा जनमत अध्यक्ष डा. चन्द्रकान्त (सिके राउत)सँग पराजित भएका जसपा अध्यक्ष यादव आफूलाई बलियो उम्मेदवारको रुपमा दाबी गरिएको छ । यादव यसपालि सत्ता गठबन्धन (मुख्य दल)को साझा उम्मेदवार छन् भने गत निर्वाचनमा बारा २ बाटै स्वतन्त्र उम्मेदवारी दिएर ११ हजार ४३ मत ल्याएका रामकिशोर प्रसाद यादवको पनि साथ छ । उनी केही दिनअघि जसपा प्रवेश गरेका थिए । महन्थ ठाकुर नेतृत्वको लोकतान्त्रिक समाजवादी पार्टी (लोसपा)ले पनि यादवले समर्थन गर्ने उर्दी जारी गरिसकेका छन् । जसपा अध्यक्ष यादवले घरदैलोमा संघीयतासहितको अधिकार प्राप्त गर्न उम्मेदवारी दिएको बताउँछन् । ‘हामीले पाएको अधिकार सुनिश्चित गर्न र संघीयतालाई संरक्षण गर्न एजेण्डालाई प्राथमिकतामा राखेका छौं,’उनले भने,‘त्यस बाहेक नागरिकता समस्या, शिक्षा, स्वास्थ्य राम्रो बनाउन र रोजगारी सिर्जनाका लागि पनि हामी काम गर्नेछौं।’ गठबन्धनको निर्णयअनुसार चुनाव लड्न आएको उनको कथन छ । यसअघि काठमाण्डु १ बाट पराजित खरेल रास्वपा प्रवेश गरी यहाँ उम्मेदवार बनेका छन् ।

गत निर्वाचनमा रास्वपाले यहाँ उम्मेदवार उठाएका थिएनन् । तर रास्वपाले समानुपातिकतर्फ एक हजार चार सय ५५ मत पाएका थिए । रास्वपाका उम्मेदवार खरेलले सुशासनको प्रत्याभूति गराउन मधेशमा उम्मेदवारी दिएको बताउँछन् । ‘स्थानीय वा मधेशका नेताहरुले सधैं सोझा जनतालाई ठग्दै आएका छन्,’उनले भने,‘ अव मधेश विकासको लागि सुशासनको लागि रास्वापा जित्नु आवश्यक छ ।’ उनले नेपाल प्रहरीमा हुँदा पनि सुशासन कायम गरेकाले चुनावी एजेण्डा पनि सुशासन नै रहेको बताए । बारा २ मा कोल्हवी नगरपालिकाको वडा नम्बर ८ र करैयामाई गाउँपालिका, महागढीमाई नगरपालिका, पचरौता नगरपालिका, सुवर्ण गाउँपालिका, देवताल गाउँपालिकाको क्षेत्र पर्छ । यहाँ एक लाख पाँच हजार दुई सय ९८ मतदाता छन् ।