वीरगंज । चोरीको स्कुटरसहित भक्तपुरको सूर्यविनायक नगरपालिका-६ पाण्डुबजारबाट तीन जनालाई ट्राफिक प्रहरीले नियन्त्रणमा लिएको छ। काभ्रेपलाञ्चोकको तिमाल गाउँपालिका-७ घर भइ हाल भक्तपुरको सूर्यविनायक बस्ने १९ वर्षीय संजिव लामा, काभ्रेपलाञ्चोककै तिमाल गाउँपालिका-७ घर भई हाल भक्तपुरको सूर्यविनायक बस्ने २३ वर्षीय नुर्भु लामा र काभ्रेपलाञ्चोकको पाँचखाल घर भइ हाल भक्तपुरको सुडाल बस्ने २३ वर्षकै कृष्ण तामाङलाई ट्राफिक प्रहरीले नियन्त्रणमा लिएको हो।

गत पुष १७ गते काठमाडौंको रातोपुलबाट हराएको बा ५४ प ९३३९ नम्बरको स्कुटर सन्जिवले भक्तपुरको सूर्यविनायक नगरपालिका-६ पाण्डुबजार सडकखण्डमा वास्तविक नम्बरमै चलाइरहेको पाइएपछि सन्जिवलाई ट्राफिक प्रहरीले नियन्त्रणमा लिएको थियो। सोधपुछका क्रममा उनले अन्य दुई जनाको संलग्नता रहेको समेत खुलाए पछि नुर्भु र कृष्णलाई पनि ट्राफिक प्रहरीले नियन्त्रणमा लिएको हो। नियन्त्रणमा आएका तिनै जनालाई थप अनुसन्धान तथा आवश्यक कारबाहीका लागि आज प्रहरी वृत्त गौशाला पठाइएको छ।

उक्त चोरी भएको स्कुटर उदयपुरको चौदण्डीगढी नगरपालिका-१० घर भई हाल काठमाडौंको बानेश्वर बस्ने धन बहादुर राउतले काठमाडौंको रातोपुलबाट हराएको भनि काठमाडौँ उपत्यका ट्राफिक प्रहरी कार्यालयमा निवेदन दिएका थिए ।निवेदनका आधारमा काठमाडौं उपत्यका ट्राफिक प्रहरी कार्यालयमा रहेको पीडित सहायता इकाईबाट खटिएको ट्राफिक प्रहरी टोलीले चोरीको स्कुटरसहित तिनै जनालाई भक्तपुरको सूर्यविनायक नगरपालिका ६ पाण्डु बजारबाट नियन्त्रणमा लिएको हो।