वीरगंज । बैशाख १० मा हुन गइरहेको उपनिर्वाचनका लागि बारा क्षेत्र नम्बर २ मा दल र स्वतन्त्रका गरि ३६ जनाले उम्मेदवारी दर्ता गराएका छन् । जसपा, नेकपा एमाले, जनमत पार्टी , नेपाल सुशासन पार्टी , राष्ट्रिय सवत्त्र पार्टी ,नागरिक उन्मुक्ति पार्टी सहितका १२ दल र २४ स्वतन्त्र गरि ३६ जनाको उम्मेदवारी परेको मुख्य निर्वाचन अधिकृत मुकेश उपाध्यायले जानकारी गराए । उम्मेदवारी दर्ताका लागि सोमबार बिहान १० देखि साँझ ५ बजेसम्मको समय निर्धारण गरिएको थियो ।
जसपाको तर्फबाट राष्ट्रिय अध्यक्ष उपेन्द्र यादवले उम्मेदवारी दर्ता गराएका छन् । उनलाई कांग्रेस , माओवादी केन्द्र , नेकपा एकिकृत समाजवादी , लोसपा लगायतका दलहरुको समर्थन छ । गत मंसिर ४ को प्रतिनिधिसभा निर्वाचनमा यादव , सप्तरी २ मा जनमत पार्टीका सिके राउतसंग भारी मतान्तरले पराजित भएका थिए । यस्तै डाक्टर सिके राउत नेतृत्वको जनमत पार्टीबाट शीवचन्द्र कुशवाहाले उम्मेदवारी दर्ता गराएका छन् । गत मंसिर ४ को प्रतिनिधिसभा निर्वाचनमा गठबन्धनका तर्फबाट यसै क्षेत्रमा उम्मेदवारी दिएर पराजित कुसवाह पनि केही दिनअघि मात्रै जनमत पार्टी प्रवेश गरेका हुन् । माओवादीबाट उम्मेदवारी दिएका उनी उपराष्ट्रपति बनेका जसपाका रामसहाय यादवसँग तीन सय ५४ मतले पराजित भएका थिए ।
नेकपा एमालेबाट भने पुर्वमन्त्री पुरुषोत्तम पौडेलले उम्मेदवारी दर्ता गराएका छन् । रवि लामिछाने नेतृत्वको राष्ट्रिय स्वतन्त्र पार्टीबाट भने रमेश खरेलले मनोनयन दर्ता गराएका छन् । गत असोजमा आफैँ नेपाल सुशासन पार्टी खोलेका खरेल केही दिनअघि मात्र रास्वपा प्रवेश गरेका हुन् । नागरिक उन्मुक्ति पार्टीबाट डाक्टर कमरुल्लाह अन्सारीले उम्मेदवारी दिएका छन् भने प्रभु साह नेतृत्वको आम जनता पार्टीबाट अरुण ज्ञवालीले उम्मेदवारी दिएका छन् । यस्तै नेपाल मजदुर किसान पार्टीबाट मुक्ति यादवको उम्मेदवारी परेको मुख्य निर्वाचन अधिकृत उपाध्यायले जानकारी दिए ।
