वीरगंज । वीरगन्ज युनाइटेड क्लब,बाराकाे सिमरामा जारी १३औं जीतपुरसिमरा गोल्डकप फुटबल प्रतियोगिताको क्वाटरफाइनलमा प्रवेश गरेको छ । सिमरा रंगशालामा शुक्रवार बेलुकी भएको खेलमा बागमती युवा क्लब सर्लाहीलाई ३–० ले हराउँदै वीरगन्जले अन्तिम आठमा स्थान पक्का गरेको हो ।

वीरगन्जको जीतमा विवेक चौधरीले २ र कृपा चौधरीले १ गोल गरेका हुन् । वीरगन्जले तीन वटै गोल खेलकाे दोस्रो हाफमा गरेको हो । खेलमा दुई गोल गरेका विवेक खेलको म्यान अफ दि म्याच घोषित भए । उनले महालक्ष्मी बिकास बैंकद्धारा प्रायोजित १० हजार राशीको म्यान अफ दि म्याच पुरस्कार प्राप्त गरे । सेमिफाइनल प्रवेशका अब वीरगन्जले आइतवार साविक बिजेता काठमाडौंकाे न्युरोड टिम एनआरटीसंग प्रतिस्पर्धा गर्नेछ ।

प्रतियोगिता अन्तर्गत शनिबार भरतपुर फूटबल क्लब चितवन र मकवानपुर ११ बीच खेल हुनेछ । जीतपुरसिमरा उपमहानगरपालिकाको मुख्य सहयोग र जगदम्बा स्टील्स् प्रालिको मुख्य प्रायोजनमा बिहिवारदेखि सुरु भएको प्रतियोगितामा ए डिभिजनका पाँचसहित १० टिमको सहभागिता रहेको छ । प्रतियोगिताको विजेताले १० लाख र उपविजेताले पाँच लाख प्राप्त गर्नेछ ।