सिराहा । सिराहामा दलितसंग गरिएको छुवाछुतको विरोधमा वीरगन्जमा प्रदर्शन गरिएको छ ।पिसफोर दलितस फाउन्डेसन नेपालको अगुवाइमा सोमबार वीरगन्जमा विरोध जुलुश निकालेर प्रदर्शन गरिएको हो । सिरहाको भगवानपुर गाउँपालिकाका अध्यक्ष उग्रनारायण यादवले फगुन २१ गते आफनी आमाको १३ औँ दिनको पुण्यतिथिमा आयोजना गरेको भोजमा दलित र गैर दलितलाई छुट्टा छुटटै राखेर खाना खुवाएका थिए ।त्यसैको विरोधमा सोमबार वीरगन्जमा पिसफोर दलितस फाउन्डेसन नेपालको अगुवाइमा दलितहरुले प्रदर्शन गरेका हुन् ।

दलितहरुले निकालेको विरोध जुलुशले वीरगन्ज नगरको परिरक्रममा पछि जिल्ला प्रशासन कार्यालय पर्सामा पुगेर दलित अगुवाहरुले ज्ञापन–पत्र पनि बुझाएका छन् ।पर्साका प्रमुख जिल्ला अधिकारी मार्फत प्रधानमन्त्रीलाई बुझाइएको उक्त ज्ञापन–पत्रमा उनिहरुले दलितसंग छुवाछुत र जातीय विभेद गर्ने गाँउपालिका अध्यक्ष यादवलाई पदबाट निलम्बन गरि हदैसम्मको कानुनी कारबाही गर्न माग गरेका छन् । साथै उक्त भोजमा सहभागी भएर जातीय विभेद र छुवाछुतको कुप्रथालाई प्रश्रय दिने सार्वजनिक पदधारण गरेका व्याक्तिहरुले सार्वजनिक रुपमा माफी माग्नु पर्ने माग पनि दलित अगुवाहरुले गरेका छन् ।

गाँउपालिका अध्यक्ष यादवले भोजमा प्लेकार्ड नै टाँसेर गैरदलित , मुस्लिम र दलितलाई अलग अलग खाने ठाउँ छुटयाएर जातीय भेदभाव गरेर अपराध गरेकाले कारबाहीको माग गर्दै प्रदर्शन गरिएको फिस फर दलित फाउण्डेशन पर्साका अध्यक्ष मनोज रामले बताए । दलितसंग गरिएको छुवाछुतको अपराधमा संलग्न व्यक्तिहरुलाई तत्काल कानुनी दायरामा ल्याएर कार्वाही नगरे देशभरकै दलित समुदाय अझ सशक्त आन्दोलनमा उत्रिन बाध्य हुने चेतावनी पनि उनले दिए । रामले भने ,‘ गाउँपालिका अध्यक्ष यादवले अक्षम्य अपराध गरेका छन् , त्यसकारण उनलाई निलम्बन गरी जातीय विभेद एवं छुवाछुत कसूर सजाय ऐन, २०६८ बमोजिम हदैसम्मको कारबाही हुनुपर्छ ।

नेपालको संविधानले छुवाछूतलाई कानुनी रूपमा दण्डनीय अपराध मानेको भएपनि नेपालका दलितले आज पनि कुनै न कुनै रूपमा दैनिक छुवाछूत जस्तो अपमान सहन बाध्य हुनु दुखद भएको फाउण्डेसनका सचिव दिपेन्द्र रामले बताए । उनले भने ,‘ आजको २१ औं शताब्दीको युगमा पनि सामाजिक कार्य , मठमन्दिर , चिया नास्ताको पसल , विवाह ब्रतबन्धका भोजमा दलितहरुले छुवाछुतको अपमान सहिरहेको छ्न् । गाउँपालिका अध्यक्ष जस्तो सार्वजनिक पदधारण गरेका व्याक्तिले नै जातीय विभेद र छुवाछुत गर्नु कानूनी अपराध भएकाले नेपालको प्रचलित कानून अनुसार हदैसम्मको कारबाही गर्नु पर्ने उनको पनि माग छ । सोमबार वीरगन्जमा गरिएको प्रदर्शनामा पिसफोर दलितस फाउन्डेसनका सदस्य अशोक राम , सन्जोग राम , दलित अगुवाहरु सन्तोष राम , सुरेन्द्र पासवान लगायतको पनि सहभागिता थियो ।