वीरगंज । इन्डियन प्रिमियर लिग (आईपीएल)को नयाँ सिजनका लागि सनराइजर्स हैदराबादको नयाँ कप्तान चयन गरिएको छ । हैदराबादले बिहीबार ट्विटरमार्फत आइदेन मार्करमलाई आईपीएलको नयाँ सिजनका लागि टिमको कप्तानी जिम्मेवारी सुम्पिएको जनाएको छ । दक्षिण अफ्रिकाका ओपनर ब्याटर मार्करम हैदराबादको नवौँ कप्तान बनेका हुन् ।

“पर्खाइ समाप्त भयो । हाम्रो नयाँ कप्तान आइदेन मार्करमलाई नमस्ते भन्नुहोस्,” हैदराबादले नयाँ कप्तानको घोषणा गर्दै ट्विटरमा लेखेको छ । मार्करमले हालै सम्पन्न दक्षिण अफ्रिकाको फ्रेन्चाइज टी–२० लिगमा आफ्नो टिम सनराइजर्स इस्टर्न केपलाई च्याम्पियन बनाएका थिए । सनराइजर्स इस्टर्न केप र सनराइजर्स हैदराबाद दुवै टिमको स्वामित्व सन ग्रुपसँग छ ।

आईपीएलको गएको संस्करणमा हैदराबादको कप्तानी केन विलियम्सनले सम्हालेका थिए । विलियम्सनको अनुपस्थितिमा भुवनेश्वर कुमारले टिमको कप्तानी जिम्मेवारी सम्हाल्दै आएका थिए । हैदराबादको मुख्य प्रशिक्षकमा वेस्ट इन्डिजका ‘लेजेन्ड’ ब्रायन लारा छन् । आईपीएलको नयाँ सिजन आउँदो मार्च ३१ देखि मे २८ तारिखसम्म हुने तालिका छ ।