रौतहट । केवल र इन्टरनेटका अव्यवस्थित तारले चन्द्रपुरका मुख्य बजारमा दुर्घटनाका साथै आगलागीको जोखिम बढेको छ । तारका कारण सडक किनारबाट हिँड्ने पैदल यात्री र साना सवारी साधनले सास्ती खेप्नु परेको छ।
राजमार्ग छेउ लत्रिएका इन्टरनेटका तार दुर्घटनाका कारक बन्ने गरेको स्थानीय बताउँछन्।जिल्लाको सदरमुकाम गौर,गरुडा,शिवनगर,कहटरिया,बजारहरूमा इन्टरनेट तथा केबल टिभी सञ्चालकले बिजुलीका पोलमा तार झुन्ड्याएका छन् । चन्द्रपुर नगरपालिका-५ स्थित विद्युत् पोलमा एक साताअघि आगो लागेको थियो ।इन्टरनेटका तारहरू सर्ट हुँदा त्यहाँ आगो लागेको थियो । बिजुलीको पोलमा इन्टरनेट नेटवर्कले राखेको तार चुँडिएर विद्युतको नांङ्गो तारमा टाँसिएर आगो लाग्ने गरेको स्थानीय बताउँछन् ।
दुई महिनाअघि चन्द्रपुरको मुख्य चोकमा विद्युतको पोलमा झुन्ड्याइएको तारमा आगो लागेको थियो । तत्काल दमकलको सहयताले आगो निभाइएको थियो । बेला बेला तारमा विधुत सर्ट हुँदा तारमा आगो लाग्ने गरेको छ। इन्टरनेट कम्पनीले पोलमा बाँधेको तार भुइँमा झर्दासमेत वास्ता नगरेको स्थानीयको गुनासो छ । इन्टरनेट,केबल र टेलिकमको पोलबाट लत्रिएका तारले बजार क्षेत्र कुरूप देखिनुका साथै पैदल यात्रु र मोटरसाइकल चालक जोखिममा रहेको चन्द्रपुरका स्थानीय चुडामणि आचार्यको भनाइ छ । पोलमा टाङ्गिएका तार व्यवस्थित नहुँदा तार हल्लिएर नांगो तारमा छुने र सर्ट भई आगलागीका घटना हुन थालेको विद्युत प्राधिकरण चन्द्रपुर शाखाका प्रमुख धीरेन्द्र यादवले बताए । चन्द्रपुर नगरपालिकाका मेयर सन्जय काफ्लेले विद्युतको पोलमा झुन्ड्याइएका तारले नगरको सुन्दरता नै बिगारेकाले त्यसलाई व्यवस्थित गर्न सम्बन्धित निकायलाई अनुरोध गर्ने बताए ।
तार व्यवस्थित नगर्दा दुर्घटनाको जोखिम उत्तिकै बढेको र व्यवस्थित गर्न अनुरोध गर्ने मेयर काफ्लेको भनाइ छ । बिजुलीका पोलमा दर्जनौं कम्पनीका तारैतार हुँदा सर्ट भइ आगलागी हुँदा नजिकैको घरमा पनि सल्किने जोखिम रहेको चन्द्रपुर-४ का वडाअध्यक्ष रवि रानामगर बताए। इन्टरनेट सेवाप्रदायक कम्पनीले राखेको प्रतिबक्स ६ सयका दरले र प्रतिकिलोमिटर ७ हजारका दरले विधुत प्राधिकरणले बिजुलीका पोलको भाडा वापतको रकम लिने गरेको छ । तार टागे बापत इन्टरनेट सेवाप्रदायक कम्पनीले विधुत प्राधिकरणलाई तोकिएको भाडा तिर्ने गरेको विधुत प्राधिकरण चन्द्रपुर शाखाले जनाएको छ ।
